कोराडी, न्यू-नागपूरपर्यंत ‘मेट्रो’चा विस्तार, इनर रिंगरोडदेखील होणार ‘कनेक्ट’

नितीन गडकरी : डीपीआर तयार करण्याच्या कामाला सुरुवात

लोकमत न्यूज नेटवर्क
नागपूर : सद्यस्थितीत शहरात मेट्रो प्रकल्पाच्या दुसऱ्या टप्प्याचे काम सुरू आहे. मात्र भविष्यातील गरजा लक्षात घेता मेट्रोचा आणखी विस्तार करण्यासाठी तिसऱ्या टप्प्याची योजना आखण्यात आली आहे. याअंतर्गत कोराडी, न्यू नागपूरपर्यंत मेट्रोचा विस्तार होईल. तसेच इनर रिंगरोडवरदेखील मेट्रो धावेल अशी माहिती केंद्रीय भूपृष्ठ वाहतूकमंत्री नितीन गडकरी यांनी दिली. सोमवारी नागपुरात आयोजित पत्रपरिषदेदरम्यान ते बोलत होते.

नागपुरातील मेट्रो प्रकल्पाच्या तिसऱ्या टप्प्याबाबत महामेट्रोच्या अधिकाऱ्यांसोबत नुकतीच बैठक झाली. या टप्प्यात नागपूर ते कोराडी या ११.५ किमी, बुटीबोरी एमआयडीसी ते सीएट लिमीटेड या ३ किमी व खापरी ते न्यू नागपूर या १५ किमीच्या मार्गाचा समावेश असेल. तसेच इनर रिंगरोडवरदेखील मेट्रो धावेल. या कामांचे डीपीआर तयार करण्याबाबत निविदा प्रकाशित करण्यात आली आहे, असे गडकरी यांनी स्पष्ट केले.

कुठल्याही देशाच्या विकासदर वाढविण्यासाठी पायाभूत सुविधांचा विकास सर्वात महत्त्वाचा असतो. आयात निर्यातीमध्ये लॉजिस्टिकचा खर्च महत्त्वाचा ठरतो. चीनमध्ये हा खर्च ८ टक्के आहे, युरोप-अमेरिकेत १२ टक्के आहे. तर आपल्या देशात हा खर्च १४ ते १६ टक्के आहे. मात्र केंद्राच्या प्रयत्नांमुळे लॉजिस्टिक खर्च ५ ते ६ टक्क्यांनी कमी होऊन ९ टक्क्यांवर आला. त्यामुळेच यंदाच्या अर्थसंकल्पात पायाभूत सुविधांसाठी १२.२० लाख कोटींची तरतूद करण्यात आली आहे. रोजगार निर्मिती करणारी अर्थव्यवस्था ही आजच्या काळातील सर्वात मोठी आवश्यकता आहे. त्यावरदेखील अर्थसंकल्पात भर देण्यात आला आहे, असे त्यांनी सांगितले.

बुद्ध सर्किटसाठी चार हजार ई-बसेस

पुर्वोत्तरमधील सहा राज्यांमध्ये पाच बुद्ध सर्किट तयार करण्यात आले आहे. या सर्किटदरम्यान चार हजार इलेक्ट्रीक बसेस चालविण्यात येतील. या पर्यावरण पूरक असतील व रोजगारनिर्मितीदेखील होईल, असे गडकरी यांनी सांगितले.

नागपुरात सी प्लेन उडणार का ?

अंबाझरीतून मुंबईत व मुंबईतून रामटेकमधील खिंडसीपर्यंत सी-प्लेन चालविण्याबाबत घोषणा करण्यात आली होती. त्याबाबत गडकरी यांनी पत्रपरिषदेत भाष्य केले. देशात सी प्लेन सेवा सुरू व्हावी यासाठी ‘व्हीजीएफ’ (व्हायबिलिटी गॅप फंड) योजना तयार करण्यात आली आहे. या योजनेच्या माध्यमातून देशात सी प्लेन सेवा सुरू होईल व पर्यटनाला चालना मिळेल, असा दावा गडकरी यांनी केला. मात्र यात नागपुरचा समावेश असेल का हे स्पष्ट होऊ शकलेले नाही.

राज्यातील १२८ रेल्वे स्थानकांचा विकास

अमृत भारत योजनेअंतर्गत राज्यातील १२८ रेल्वे स्थानकांचा विकास करण्यात येत आहे. त्यात नागपूर, अजनी, अकोला, आमगाव, अमरावती, बडनेरा, बल्लारपूर, भंडारा मार्ग, चंद्रपूर, धामणगाव, गोधनी, गोंदिया, हिंगणघाट, इतवारी, कामठी, काटोल, किनवट, मलकापूर, मूर्तीजापूर, नांदगाव, नांदुरा, नंदुरबार, नरखेड, पुलगाव, सेलू,सेवाग्राम, शेगाव, तळेगाव, तुमसर मार्ग, वडसा, वर्धा, वाशीम, चांदा फोर्ट या विदर्भातील स्थानकांचा प्रामुख्याने समावेश आहे, असे गडकरी यांनी सांगितले.