संजय राऊतांवर राजद्रोहाचा गुन्हा दाखल करण्यात यावा, कृष्णा खोपडे यांची मागणी

थोडी नैतिकता शिल्लक राहिली असेल तर उद्धव ठाकरे यांनी मुख्यमंत्रिपदाचा तत्काळ राजीनामा द्यावा, असेदेखील खोपडे म्हणाले.

नागपूर : सध्याच्या राजकीय परिस्थितीवर भाजप नेत्यांना मौन बाळगण्याचे निर्देश असताना पूर्व नागपूरचे आमदार कृष्णा खोपडे यांनी शिवसेनेवर जोरदार टीका केली आहे. शिवसेना नेते खा. संजय राऊत उलटसुलट वक्तव्य देऊन राज्यातील शांतता भंग करण्याचे व राज्यात दंगली भडकविण्याचा प्रयत्न करीत आहेत. त्यामुळे त्यांच्यावर राजद्रोहाचा गुन्हा दाखल करून तत्काळ त्यांना अटक करावी, अशी मागणी खोपडे यांनी केली.

राणा दाम्पत्याने मातोश्री समोर हनुमान चालीसा म्हणण्याची घोषणा केली, तर त्यांच्यावर राजद्रोहाचा खटला चालविण्यात आला. आता उघडपणे धमक्या दिल्या जात असताना राऊतांवर देखील अशीच कारवाई करायला हवी. शिवसेनेचे कार्यकर्ते ज्या प्रमाणे रस्त्यावर येऊन गुंडागर्दी करीत आहेत, त्यावरून उद्धव ठाकरे यांचे सरकार कायदा व सुव्यवस्था सांभाळण्यात अयशस्वी ठरल्याचे स्पष्ट होत आहे.

राज्यातील नागरिकांच्या हितापेक्षा उद्धव ठाकरे यांना स्वत:ची खुर्ची वाचविण्यात जास्त रस आहे, असा आरोप खोपडे यांनी लावला. जर थोडी नैतिकता शिल्लक राहिली असेल तर उद्धव ठाकरे यांनी मुख्यमंत्रिपदाचा तत्काळ राजीनामा द्यावा, असेदेखील खोपडे म्हणाले.