नागपूर : उधार दिलेले ५० हजार रुपये परत मागणाऱ्यावर आरोपींनी कोयत्याने हल्ला चढवून त्याचा जीव घेण्याचा प्रयत्न केला. शनिवारी मध्यरात्रीनंतर घडलेल्या या घटनेने पाचपावलीच्या लाल दरवाजा परिसरात प्रचंड थरार निर्माण झाला होता.
गुलशन कवडूजी बोकडे (वय २६) असे जखमीचे नाव असून तो यशोधरानगरातील धम्मदीपनगरात राहतो. गुलशनने काही दिवसांपूर्वी ऋषभ राधेशाम पैगवार (वय २४) याला ५० हजार रुपये उधार दिले होते. ते परत करण्यासाठी आरोपी टाळाटाळ करीत होता. त्यामुळे शनिवारी मध्यरात्री गुलशन त्याच्या मित्रासह आरोपी पैगवार याच्या पिवळी मारबत चाैकाजवळच्या घरी गेला. पैसे परत मागताच आरोपी पैगवारने गुलशनला ‘नाही देत’, असे म्हणून अश्लील शिवीगाळ केली. त्यावरून या दोघांमध्ये बाचाबाची सुरू असताना आरोपी पैगवारचे दोन भाऊ आले. त्यांनी गुलशनला लाथाबुक्क्यांनी बेदम मारहाण केली तर आरोपी पैगवारने घरातून कोयता आणून गुलशनच्या पोटावर घाव घातला. त्यामुळे तो गंभीर जखमी झाला. आरडाओरड ऐकून बाजूची मंडळी धावली. त्यांनी आरोपीच्या तावडीतून गुलशनला सोडवले. माहिती कळताच पाचपावली पोलीस पोहचले. जखमी गुलशनला मेयोत दाखल करण्यात आले असून त्याची प्रकृती गंभीर आहे. पोलिसांनी प्राणघातक हल्ल्याचा गुन्हा दाखल केला असून आरोपींची चौकशी सुरू आहे.
कळमन्यातही प्राणघातक हल्ला
नागपूर : जुन्या वादातून दोन आरोपींनी विपीन दुर्गाप्रसाद शाहू (वय १८) याला चाकूने मारून गंभीर जखमी केले. शनिवारी दुपारी २ च्या सुमारास कळमना पोलीस ठाण्याच्या हद्दीत ही घटना घडली. राहुल बागडे (रा. लक्ष्मीनगर) तसेच शुभम काशीनाथ कदम (वय २४, रा. दत्तनगर) यांचा विपीनसोबत काही दिवसांपासून वाद होता. या वादातून ही घटना घडली. विपीनचा भाऊ अनिल दुर्गाप्रसाद शाहू (रा. शिवमंदिरजवळ कळमना) यांनी दिलेल्या तक्रारीवरून कळमना पोलिसांनी आरोपी बागडे आणि कदमविरुद्ध प्राणघातक हल्ल्याचा गुन्हा दाखल केला. आरोपी कदमला अटक करण्यात आली असून, बागडेचा शोध सुरू आहे.
------