लोकमत न्यूज नेटवर्क
नागपूर - कोलकाता (पश्चिम बंगाल) मधील एका स्टील कंपनीच्या मालकाच्या अल्पवयीन मुलीचे अपहरण करून तिला नागपुरात घेऊन येणाऱ्या आरोपीला गुन्हे शाखेच्या सामाजिक सुरक्षा पथकाने (एसएसबी) जेरबंद केले. रहमत कलाम शेख (वय २७), असे त्याचे नाव असून, तो २४ परगना जिल्ह्यातील गोलाबराई महेशपूर (मागराहाट) येथील रहिवासी आहे.
विवाहित असलेला रहमत शेख मागराहाट येथील एका स्टील कंपनीत काम करायचा. कंपनी मालकाच्या १६ वर्षीय मुलीला प्रेमजाळ्यात ओढून त्याने ६ मार्चला तिचे अपहरण केले. मागराहाट पोलिसांनी अपहरणाचा गुन्हा दाखल करून आरोपींचा शोध सुरू केला असता तो युवतीसह नागपुरात असल्याचे त्यांच्या लक्षात आले. त्यामुळे परगना पोलिसांनी पोलीस आयुक्त अमितेशकुमार यांच्याशी संपर्क साधला. आयुक्तांनी लगेच आरोपी, तसेच अपहृत मुलीचा शोध घेण्याचे आदेश दिले. त्यानुसार एसएसबीच्या पथकाने यशोधरानगरातील एका रेडिमेड कपड्याच्या कारखान्यात काम करणाऱ्या रहमत शेखला ताब्यात घेतले. त्याने दिलेल्या माहितीवरून शनिवारी दुपारी अपहृत युवतीला सीताबर्डीच्या मोदी नंबर ३ मध्ये (आनंदनगर) ताब्यात घेतले. ही माहिती परगना पोलिसांना कळविण्यात आली. त्यानुसार, तेथील पोलीस पथक नागपुरात पोहोचले. आरोपी आणि पीडित युवतीला त्यांच्या ताब्यात देण्यात आले.
----
तो तीन मुलांचा बाप, ती दहावीची विद्यार्थिनी
आरोपी रहमत शेख हा तीन मुलांचा बाप असून, त्याने लग्न करण्याचे आमिष दाखवून पळवून आणलेली युवती दहावीची विद्यार्थिनी असल्याचे समजते. त्याने नागपुरात तिच्यासोबत शरीरसंबंधही प्रस्थापित केल्याचा संशय असून, वैद्यकीय तपासणीत त्याला दुजोरा मिळाल्यास आरोपीवर बलात्काराचाही गुन्हा दाखल होऊ शकतो.
-----