नागपुरात निवासी डॉक्टरांसाठी २५० खोल्यांचे वसतिगृह
By लोकमत न्यूज नेटवर्क | Published: April 30, 2018 10:58 PM2018-04-30T22:58:14+5:302018-04-30T22:58:27+5:30
जर्जर झालेल्या व अर्धवट सोयींच्या वसतिगृहापासून मेडिकलच्या निवासी डॉक्टरांची सुटका होणार आहे. मेडिकल प्रशासनाच्या अथक परिश्रमानंतर ५७ कोटींच्या पाच मजली वसतिगृहाच्या बांधकामाला सुरुवात झाली आहे. २५० खोल्या असलेली ही इमारत पर्यावणपूरक म्हणजे ‘ग्रीन बिल्डिंग’ असणार आहे. राज्यातील वैद्यकीय महाविद्यालयांमध्ये ही पहिली इमारत ठरणार आहे.
![A Hostel of 250 rooms for resident doctors in Nagpur | नागपुरात निवासी डॉक्टरांसाठी २५० खोल्यांचे वसतिगृह A Hostel of 250 rooms for resident doctors in Nagpur | नागपुरात निवासी डॉक्टरांसाठी २५० खोल्यांचे वसतिगृह](https://d3pc1xvrcw35tl.cloudfront.net/images/840x630/medical-mard-hostel_20180482621.jpg)
नागपुरात निवासी डॉक्टरांसाठी २५० खोल्यांचे वसतिगृह
लोकमत न्यूज नेटवर्क
नागपूर : जर्जर झालेल्या व अर्धवट सोयींच्या वसतिगृहापासून मेडिकलच्या निवासी डॉक्टरांची सुटका होणार आहे. मेडिकल प्रशासनाच्या अथक परिश्रमानंतर ५७ कोटींच्या पाच मजली वसतिगृहाच्या बांधकामाला सुरुवात झाली आहे. २५० खोल्या असलेली ही इमारत पर्यावणपूरक म्हणजे ‘ग्रीन बिल्डिंग’ असणार आहे. राज्यातील वैद्यकीय महाविद्यालयांमध्ये ही पहिली इमारत ठरणार आहे.
शासकीय वैद्यकीय महाविद्यालय व रुग्णालय (मेडिकल) व सुपर स्पेशालिटी हॉस्पिटल मिळून ५०० निवासी डॉक्टर आपली सेवा देतात. या डॉक्टरांच्या निवासासाठी ‘मार्ड’ वसतिगृह व वसतिगृह क्रमांक सात हे आहे. या दोन्हींची क्षमता २५०वर नाही. यामुळे एका खोलीत दोन किंवा त्या पेक्षा जास्त डॉक्टरांना एकत्र राहावे लागते. यात ‘मार्ड’चे वसतिगृह जुने व जीर्ण झाले आहे. येथे गडरलाईनपासून पाण्याची समस्या आहे. ही इमारतच मोडकळीस आल्याने स्वच्छतेला वाव नाही. २४ तास वैद्यकीय सेवेत असणाऱ्या निवासी डॉक्टरांसाठी हे वसतिगृह आरामदायी नाही. येथील गैरसोयींना घेऊन निवासी डॉक्टर नेहमीच तक्रारीचा सूर आळवत असतात. विशेष म्हणजे, तत्कालीन वैद्यकीय शिक्षण मंत्री जितेंद्र आव्हाड यांनी मेडिकलमध्ये घेतलेल्या ‘कॉफी विथ स्टुडंटस्’मध्ये तर निवासी डॉक्टरांनी वसतिगृहातील तक्रारींचा पाऊसच पाडला होता. यात प्रामुख्याने अस्वच्छता, तुंबलेल्या ड्रेनेज लाईन, घाणीत असलेले स्वच्छतागृह, पाण्याचा तुटवडा आदी तक्रारी होत्या. आव्हाड यांनी या तक्रारींना घेऊन अधिष्ठात्यांना धारेवर धरले होते. याच दरम्यान मेडिकल व शासकीय दंत महाविद्यालयाच्या संयुक्त समितीने वसतिगृहांची पाहणी करून नूतनीकरणाचा प्रस्ताव मंत्र्यांकडे पाठविला होता. परंतु इमारतच मोडकळीस आल्याने नवीन इमारतीचा प्रस्ताव अधिष्ठाता डॉ. अभिमन्यू निसवाडे यांनी पाठविला. त्याचा पाठपुरावा केला. अखेर शासनाने निवासी डॉक्टरांच्या समस्या लक्षात घेऊन नव्या वसतिगृहासाठी ५७ कोटींची तरतूद केली असून काही निधी मेडिकलच्या तिजोरीत जमाही झाला आहे.
वसतिगृहाची इमारत पर्यावणपूरक
निवासी डॉक्टरांसाठी असलेले वसतिगृह पाच मजली राहणार असून इमारत पर्यावरणपूरक असणार आहे. या ‘ग्रीन बिल्डिंग’मध्ये अपारंपरिक ऊर्जा स्रोतांचा जास्तीत जास्त वापर केला जाणार आहे. इमारतीत २५० खोल्यांची सोय राहणार असून प्रत्येक खोलीमध्ये स्वतंत्र स्वच्छतागृह असेल. विशेष म्हणजे, हे वसतिगृह ट्रॉमा केअर सेंटरच्या मागील दोन एकर परिसरात होणार असल्याने डॉक्टरांना वसतिगृहातून लवकर रुग्णालयात पोहचणे शक्य होईल.
पदव्युत्तर विद्यार्थ्यांसाठीही लवकरच वसतिगृह
निवासी डॉक्टरांच्या नव्या वसतिगृहाच्या बांधकामाला ५७ कोटी रुपये खर्च येणार आहे. अत्याधुनिक सोयी सुविधांनी हे वसतिगृह सज्ज असेल. विशेष म्हणजे ही ‘ग्रीन बिल्डिंग’ असणार आहे. शासन निवासी डॉक्टरांच्या समस्यांबाबत गंभीर असल्यामुळेच या नव्या वसतिगृहाला मंजुरी दिली आहे. मेडिकलमध्ये पदव्युत्तर (पीजी) अभ्यासक्रमाच्या जागा वाढत आहे. यामुळे या विद्यार्थ्यांसाठीही वसतिगृहाचा प्रस्ताव विचाराधीन आहे.
डॉ. अभिमन्यू निसवाडे
अधिष्ठाता, मेडिकल