‘पेसो’ने स्फोटक कंपन्यांच्या प्रोटोकॉलमध्ये सुधारणा करण्याची आवश्यकता

मुख्यमंत्री देवेंद्र फडणवीस : राऊळगाव ‘एसबीएल’ स्फोटातील जखमींची घेतली भेट

योगेश पांडे

नागपूर : ‘एसबीएल’ कंपनीतील स्फोटासाठी जबाबदार असलेल्या दोषी व्यक्तींवर कठोर कारवाई करण्यात येईल, असे मुख्यमंत्री देवेंद्र फडणवीस यांनी स्पष्ट केले. सोमवारी रात्री त्यांनी ऑरेंज सिटी इस्पितळात जाऊन जखमींची भेट घेतली व त्यांना धीर दिला. यावेळी त्यांनी ‘पेसो’ने स्फोटक कंपन्यांच्या प्रोटोकॉलमध्ये काळानुरूप सुधारणा करावी असे प्रतिपादन केले.

या प्रकरणातील २१ लोकांविरोधात गुन्हा दाखल झाला असून काही लोक फरार आहेत. मृतकांच्या कुटुंबियांना नुकसानभरपाई जाहीर झाली आहे. मात्र मागील काही कालावधीत स्फोटक कंपन्यांमध्ये झालेल्या स्फोटांनंतर एकूणच प्रक्रियेचे अवलोकन करण्याची गरज आहे. केंद्राचे कायदे आहेत, मात्र काळानुरूप त्यात काही बदलांची गरज आहे. अगदी एखादा बॉक्स जरी पडला तरी मोठा स्फोट होऊ शकतो. या कंपन्यांमध्ये ऑटोमेशन करण्याच्या अनुषंगाने बदल करता येईल काय याबाबत अभ्यासपूर्ण अहवाल केंद्राला पाठविण्यात येईल असे मुख्यमंत्र्यांनी स्पष्ट केले. अनेक नियम जुने झाले आहेत. २००८ साली जे नियम होते त्या पातळीचे काम आज होत नाही. त्यामुळे स्फोटक कंपन्यांच्या प्रोटोकॉलला तपासून त्यात आवश्यक बदल झाले पाहिजे. सर्वात महत्त्वाचे म्हणजे भविष्यात अशा घटना होऊ नये यासाठी काम केले पाहिजे, असे मुख्यमंत्री म्हणाले.