भरधाव कारने बाईकस्वारास उडविले

अमरावती रोड युनिव्हर्सिटी कॅम्पससमोर एका भरधाव कारने दुचाकीला जोरदार धडक दिली. यात

दोघे जखमी : पोलिसांची संशयास्पद भूमिका
नागपूर :  अमरावती रोड युनिव्हर्सिटी कॅम्पससमोर एका भरधाव कारने दुचाकीला जोरदार धडक दिली. यात दुचाकीस्वार दोन तरुण गंभीर जखमी  झाले. आरोपी कारचालकाने घटनास्थळावरून पळून जाण्याचा प्रयत्न केला. बुधवारी रात्री १.३0 वाजताच्या सुमारास घडलेल्या या घटनेप्रकरणी  आरोपीविरुद्ध अजूनही गुन्हा दाखल झाला नसल्याने पोलिसांच्या भूमिकेवरही प्रश्नचिन्ह निर्माण झाले आहे.
 आरोपी कारचालक गोकुळपेठ येथील एका चर्चित बार मालकाचा मुलगा समीर शर्मा असल्याचे सांगितले जाते. जखमींमध्ये महाविद्यालयीन विद्यार्थी  जोगीनगर गल्ली नं. ८ येथील प्रफुल्ल अनिल पानतावणे (१८) आणि कुंजीलालपेठ येथील आशय ऊर्फ आशु संजय डोंगरे (२४) यांचा समावेश  आहे.  मिळालेल्या माहितीनुसार आशुच्या नातेवाईकाच्या घरी वाडी येथे एक समारंभ होता. या समारंभात आशु आणि प्रफुल्लसह त्याचे आणखी इतर  दोन मित्र गेले होते. आशु व प्रफुल्ल बाईक क्र. एमएच/३१/ईसी/00१३ आणि त्यांचा मित्र निखील फुलझेले व बंटी दुसर्‍या एका बाईकवर होते. रात्री  कार्यक्रम आटोपून चारही मित्र कॅम्पस रोडने बर्डीकडे परतत होते. निखील आणि बंटी पुढे होते तर आशु आणि प्रफुल्ल मागे होते. यादरम्यान कार  क्रमांक एमएच/३१/ईए/१८१२ ही भरधाव वेगाने येऊन आशु व प्रफुल्लच्या बाईकला जोरदार धडक दिली. या धडकेत आशु रस्त्याच्या बाजूला  असलेल्या नाल्यात जाऊन पडला तर प्रफुल्ल रस्त्यावरच बेहोश पडला. दोघांना गंभीर जखमी अवस्थेत पाहून कार चालक पळून जाण्याचा प्रयत्न  करू लागला. या प्रयत्नात त्याची कार डिव्हायडरला धडकून रस्त्यावरच पलटली. जोरात आवाज झाल्याने समोर चालत असलेल्या निखील आणि  बंटीने मागे वळून पाहिले तेव्हा आशु व प्रफुल्ल नव्हते. त्यामुळे त्यांनी बाईक मागे वळवली.
युनिव्हर्सिटी कॅम्पसजवळ आल्यावर त्यांना आशुची बाईक अपघातग्रस्त पडलेली दिसून आली. थोड्या अंतरावर दोघेही मित्र रक्ताच्या थारोळ्यात  पडून होते. त्यांनी जखमींना जवळच्याच एका खासगी रुग्णालयात दाखल केले.  अपघाताच्या दुसर्‍या दिवशी अंबाझरी ठाण्याकडून पोलीस माहिती  केंद्रालाही अपघाताची सूचना देण्यात आली नव्हती. यासंबंधात अंबाझरी ठाण्यात अनेकदा फोन करून संपर्क साधला असता या अपघातात  कोणत्याही कारचालकाविरुद्ध गुन्हा दाखल नसल्याचे सांगण्यात आले. (प्रतिनिधी)
आरोपीने रुग्णालयात घातला गोंधळ
आरोपी समीर रात्री २ वाजताच्या सुमारास जखमींवर उपचार सुरू असलेल्य रुग्णालयात आपल्या साथीदारासोबत पोहोचला. तिथे जखमींच्या  मित्रांसोबत समीर वाद घालू लागला. दरम्यान डॉक्टर तिथे आल्यावर त्यांनाही धक्काबुक्की करू लागला. रुग्णालयातील कर्मचार्‍यांनी पोलिसांना  कळविले. पोलीस आल्यानंतरही आरोपी जखमींच्या नातेवाईकांना पोलिसात तक्रार न करण्याबाबत धमकावित असल्याचे सांगण्यात येते.