भाजप नगरसेविकेने रोखला पूल

एकीकडे महापालिका काही भागात काम मंजूर न करताच कामाला सुरुवात करते तर मानकापूर रिंग रोड ....

कमलेश वानखेडे नागपूरनागपूर : एकीकडे महापालिका काही भागात काम मंजूर न करताच कामाला सुरुवात करते तर मानकापूर रिंग रोड परिसरातील संगमनगर पुलाच्या कामाचा वर्कआॅर्डर होऊन तीन महिने होऊनही महापालिकेने काम सुरू केलेले नाही. रविवारी सकाळी या पुलावरून दुचाकीने जात असलेल्या मुस्लिम दाम्पत्याला अपघात झाला व दुचाकीसह नाल्यात कोसळले. यात ते गंभीर जखमी झाले. वर्कआॅर्डर होऊनही या पुलाचे काम सुरू न होण्यामागे भाजपच्या नगरसेविका मीना तिडके यांनी टाकलेला राजकीय दबाव हेच प्रमुख कारण असल्याचा आरोप या भागातील नागरिकांनी केला आहे. मात्र, नगरसेविका तिडके यांनी या आरोपांचे खंडन केले आहे. मानकापूर रिंग रोड पसिरात राठोड लॉनच्या मागे संगम नगर आहे. या संगनगरला जाण्यासाठी एक नाला ओलांडून जावा लागतो. या नाल्याला गडरचे भरपूर पाणी असते. नाल्याला लागूनच मुस्लिम लोकवस्ती आहे. नाल्यावर पूल नसल्यामुळे ये-जा करण्यासाठी सिमेंटच्या फळ्या टाकण्यात आल्या आहेत. यावरूनच नागरिकांना आपली आपली दुचाकी वाहनेही न्यावी लागतात. रविवारी सकाळी शेख रफिक सैलानी हे पत्नीसह या पुलावरून जात असताना तोल जाऊन दुचाकीसह नाल्यात पडले. यात सैलानी हे जखमी झाले तर त्यांच्या पत्नीला गंभीर इजा झाली. त्यांना उपचारार्थ अवस्थीनगर येथील ओअ‍ॅसिस हॉस्पिटलमध्ये दाखल करण्यात आले. संगमनगरचा हा पूल मुस्लिम वस्तीला जोडणारा आहे व या भागातील मुस्लिमांची मते महापालिकेच्या निवडणुकीत आपल्याला मिळाली नसल्याचा आकस म्हणून भाजपच्या नगरसेविका मीना तिडके यांनी या पुलाचे काम थांबविले असल्याचा आरोप येथील नागरिकांनी केला आहे. एकीकडे महापालिका काही भागात काम मंजूर न होताच कामाला सुरुवात करते तर येथे पुलाच्या कामाचा वर्कआॅर्डर होऊन तीन महिने होऊनही काम सुरू करीत नाही, यामागे तिकडे यांनी टाकलेला राजकीय दबाव हेच कारण असल्याचा आरोपही या भागातील नागरिकांनी ‘लोकमत’शी बोलताना केला. याबाबत मंगळवारी झोनचे सहायक आयुक्त प्रकाश वऱ्हाडे यांना विचारणा केली असता ते म्हणाले, संबंधित पुलाचे काम गेल्या चार महिन्यांपासून मंजूर आहे. तीन महिन्यांपूर्वीच वर्कआॅर्डरही देण्यात आला आहे. मात्र, संगमनगर पुलापासून काही अंतरावर नासुप्रतर्फे दुसरा पूल बांधण्यात येत आहे. त्यामुळेच त्याचवेळी महापालिकेनेही या पुलाचे काम सुरू केले तर दोन्हीकडून या वस्तीचा संपर्क तुटेल. त्यामुळे नासुप्रच्या पुलाचे काम पूर्ण झाल्यावर महापालिका या पुलाचे काम सुरू करेल. मात्र, लोकमतने केलेल्या पडताळणीत नासुप्रच्या पुलाच्या पूर्वीच महापालिकेने संगमनगर पुलाला मंजुरी दिली असूनही काम सुरू न केल्याचे स्पष्ट झाले आहे. या विलंबासाठी महापालिका प्रशासनाकडेही ठोस उत्तर नाही.६५ लाख रुपये मंजूर महापालिकेतर्फे संबंधित नाल्यावर पुलाचे बांधकाम करण्यात येणार आहे. यासाठी ६५ लाख रुपये मंजूर केले आहेत. तीन महिन्यांपूर्वीच या कामासाठी वर्कआॅर्डर देण्यात आला आहे. मात्र, त्यानंतरही संबंधित काम सुरू झालेले नाही. नागरिकांच्या शिष्टमंडळाने यापूर्वीच आयुक्त श्रावण हर्डीकर, स्थायी समिती अध्यक्ष यांची भेट घेतली होती. पण काहीच झाले नाही. पुलासाठी मीच प्रयत्न केले- तिडके याप्रकरणी नगरसेविका मीना तिडके म्हणाल्या, मी कधीच मतांचे राजकारण करीत नाही. संगमनगर नाल्याला पूर आला असता आपणच पुढाकार घेऊन आयुक्तांना घेऊन पाहणी केली व पुलाचे काम मंजूर केले. वर्कआॅर्डर करून घेतला. या पुलापासून काही अंतरावरच नासुप्रतर्फे दुसरा पूल बांधल्या जात आहे. २०० लोकवस्तीसाठी कोणताही एक पूल पुरेसा आहे. शिवाय महापालिकेची आर्थिक स्थिती चांगली नाही. त्यामुळे हा निधी दुसरीकडे पूल बांधण्यासाठी वापरता येईल. पण काही लोक राजकारण करून मूळ मुद्दाच समजून घेण्याच्या मनस्थितीत नाही, असेही तिडके यांनी सांगितले.