लाल मिरचीच्या २५ हजार पोत्यांची आवक

लोकमत न्यूज नेटवर्क

नागपूर : गेल्या सोमवारी कळमना बाजारात लाल मिरचीच्या २५ हजार पोत्यांची आवक झाली आहे. मिरचीची खेप आणखीन उतरणार असल्याने मिरचीचे भावही घसरणार असल्याचे भाकीत व्यापारी वर्तवत आहेत. त्याच अनुषंगाने आतापासूनच व्यापाऱ्यांची लगबग सुरू झाली आहे.

आपल्या वैशिष्ट्यपूर्ण चवीसाठी जगभरात प्रसिद्ध असलेल्या भिवापुरी लाल मिरची बाजारात उतरायला लागली आहे. यासोबतच अन्य उत्पादक क्षेत्रातूनही लाल मिरचीचे आगमन मोठ्या प्रमाणात कृषी उत्पन्न बाजार समितीच्या कळमना येथील मिरची बाजारात व्हायला लागले आहे. सद्यस्थितीत ही आवक सामान्य मानली जात असून, डोमेस्टिक, एक्सपोर्टर्स व स्टॉकिस्टकडून मोठ्या प्रमाणात मागणी वाढल्याने लाल मिरचीचे दर ५-७ रुपयांनी वाढले आहेत. मात्र, १५ मार्चनंतर लाल मिरचीची आवक वाढल्यावर हे दर कमी होतील, असे भाकीत ठोक व्यापाऱ्यांकडून मिळत आहे. कळमना येथे प्रत्येक सोमवारी शेतकऱ्यांकडून मिरची खरेदी केली जाते. त्याच अनुषंगाने सोमवारी कळमना येथे २५ हजार बोरे लाल मिरचीचे उतरले. यात भिवापूरसह अन्य स्थानिक शेतकऱ्यांचे ७ हजार बोरे, चिखली-बुलडाणा-राजूरा आदी महाराष्ट्रातील अन्य ठिकाणांवरून ७ हजार आणि आंध्र प्रदेश येथील गुंटूर, खम्ममचे १० ते १२ हजार लाल मिरचीच्या बोऱ्यांचा समावेश असल्याचे कळमना मिरची बाजारातील ठोक व्यापारी संजय वाधवानी यांनी सांगितले. यंदा लाल मिरचीचे उत्पादन उत्तम झाल्याने आगामी काळात मोठ्या प्रमाणात आवक वाढणार असल्याचेही ते म्हणाले.

सद्यस्थितीत १२० ते १६० रुपये किलो

भिवापूर, मांढळ येथील रोशनी लाल मिरची होलसेलमध्ये १२० ते १४० रुपये, राजूरा येथील डीडीफाय लाल मिरची १३० ते १६० रुपये, एण्डाफाय लाल मिरची १३० ते १५० रुपये, खम्मम/गुंटूरची तेजा मिरची १४० ते १५५ रुपये, ३३४ ग्रेडची लाल मिरची १२० ते १२५ रुपये किलो दराने सद्यस्थितीत विकली जात आहे. हे दर येत्या काळात आवक वाढल्यावर घसरण्याची शक्यता आहे.

ओरिजिनल भिवापुरी मिरची महाग

ओरिजिनल भिवापुरी लाल मिरचीचे उत्पादन कमी झाल्याने, ही मिरची २०० रुपये किलो दराने विकली जात असल्याचे मिरची उत्पादक शेतकरी नारायण चौधरी यांनी सांगितले. भिवापुरी हायब्रिडचे दरही २०० रुपये किलो सुरू आहे. कमी उत्पादन क्षमता असल्याने शेतकरी ओरिजिनल भिवापुरीऐवजी हायब्रिड लाल मिरचीचे पीक घेण्यावर भर देत आहेत. विशेष म्हणजे हिरवी भिवापुरी मिरची प्रारंभिक अवस्थेतच तोडून देशाच्या अन्य भागात विकली जात असल्याने, ओरिजिनल भिवापुरी मिरचीचा तुटवडा निर्माण झाला आहे. ओरिजिनलला जिओग्राफिकल इंडिकेशन (जीआय) मिळाल्यावरही कृषी विद्यापीठाकडून या मिरचीचे उत्पादन वाढविण्याच्या अनुषंगाने अनुसंधान केले जात नसल्याने शेतकरी हायब्रिडकडे आकर्षित होत असल्याचे नारायण चौधरी म्हणाले.

.........