अन् १०० मिनिटांनी सुरू झाले बंद पडलेल्या ह्रदयाचे ठोके

गंभीर अवस्थेत त्याला नेल्सन हॉस्पिटलमध्ये दाखल करण्यात आले. त्याची अवस्था अत्यंत नाजूक होती.  

सुमेध वाघमारे -

नागपूर : सलग १०० मिनिटांहून अधिक काळ ‘सीपीआर’ देऊन डॉक्टरांनी एका ११ वर्षांच्या मुलाला अक्षरश: मृत्यूच्या दाढेतून खेचून आणले.  नेहमीप्रमाणे मित्रांसोबत खेळून घरी परतत असताना मिरवणुकीतील वाहनावरील नियंत्रण सुटले आणि तब्बल ५०० किलो वजनाचा जनरेटर सेट या चिमुकल्यावर कोसळला.  नागपूरमध्ये ही घटना घडली.

गंभीर अवस्थेत त्याला नेल्सन हॉस्पिटलमध्ये दाखल करण्यात आले. त्याची अवस्था अत्यंत नाजूक होती.  बालरोग तज्ज्ञ डॉ. यश बनाईत यांच्या नेतृत्वाखालील टीमने तत्काळ  व्हेंटिलेटरवर ठेवले. मात्र, अचानक त्याच्या ह्रदयाचे ठोके थांबले. डॉक्टरांनी हार मानली नाही. तत्काळ ‘सीपीआर’ देण्यास सुरुवात केली. सलग १०० मिनिटांहून अधिक वेळ ‘सीपीआर’ दिला आणि अखेर डॉक्टरांच्या प्रयत्नांना यश आले आणि मुलाच्या हृदयाचे ठोके परत आले. तो क्षण सर्वांसाठी एका चमत्कारापेक्षा कमी नव्हता.