हॉटेलच्या नावावर ५६ लाखांची फसवणूक

दुबई (शारजाह) येथे हॉटेल उघडून देण्याचे आमिष दाखवून डाक विभागातील एका सेवानिवृत्त अधिकारी व त्यांच्या मुलीला ५६ लाख रुपयांचा चुना लावण्यात आल्याचे प्रकरण उघडकीस आले आहे.

नागपूर : दुबई (शारजाह) येथे हॉटेल उघडून देण्याचे आमिष दाखवून डाक विभागातील एका सेवानिवृत्त अधिकारी व त्यांच्या मुलीला ५६ लाख रुपयांचा चुना लावण्यात आल्याचे प्रकरण उघडकीस आले आहे. अंबाझरी पोलिसांनी मंगलोर येथील चार आरोपीविरुद्ध फसवणुकीचा गुन्हा दाखल केला आहे. सुरजबाबू गौडा कोटीयान, अजयबाबू गौडा कोटीयान, चंद्रशेखर उपाध्याय आणि कृष्णानंद उपाध्याय अशी आरोपीची नावे आहेत. शांतिनगर येथील ६६ वर्षीय शेख अजीज शेख जुम्मन डाक विभागात सहायक पोस्ट मास्तर जनरल पदावरून सेवानिवृत्त झाले. त्यांची मुलगी तसमीन कौशर या दुबईतील बँकेत अधिकारी आहे. दुबर्इंमध्ये काम करीत असताना तसमीन यांची आरोपींसोबत ओळख झाली. आरोपींनी तसमीनला हॉटेलच्या व्यापारात खूप लाभ असल्याचे सांगून भागीदारीमध्ये हॉटेल उघडण्याचे आमिष दाखविले. तसमीन त्यांच्या आमिषाला बळी पडली आणि तिने शारजाह येथे हॉटेल उघडण्याची योजना आखली. तसमीनने आपल्या वडिलांनाही ही योजना सांगितली. मुलीची इच्छा असल्याने वडीलही राजी झाले. शेख अजीज यांनी २९ आॅगस्ट २००९ रोजी आरोपींना कर्नाटक बॅँकेच्या गांधीनगर शाखेतून ६ लाख रुपये दिले. यानंतर १ मे २०१० दरम्यान त्यांनी १३ लाख ५० हजार रुपये आरोपीला दिले. या दरम्यान तसमीननेसुद्धा आरोपीला दुबईच्या इमीरेट एनडीडी बँकेतून २ लाख ८५ हजार ३०८ दिरहम (दुबईचे चलन) दिले. याप्रकारे शेखअजीज आणि तसमीन यांनी आरोपीला एकूण ५६ लाख ३७ हजार ४५० रुपये दिले. काही दिवसानंतर आरोपींनी शारजाह येथे हॉटेल उघडले. सूत्रानुसार सुरुवातीला हॉटेल चांगले चालले. लाभ होत असल्याने आरोपींची नियत बिघडली. त्यांनी लाभाचे पैसे आपल्याजवळ ठेवून घेतले. यानंतर योग्य व्यवस्थापन होत नसल्याने हॉटेल डबघाईस आले. त्यामुळे आरोपींनी हॉटेल दुसर्‍याला विकून टाकले. तसमीनला याची माहितीसुद्धा होऊ दिली नाही. हॉटेल विकून मिळालेले पैसे घेऊन आरोपी भारतात परत आले. गेल्या वर्षभरापासून तसमीन आणि तिचे वडील गुन्हा दाखल करण्यासाठी भटकत होते. त्यांनी भारतीय दूतावासासह अनेक ठिकाणी तक्रार दाखल केली आहे. दोन देशांचे प्रकरण असल्याने पोलिसांसमोरही प्रश्न उभा आहे. रविवारी अंबाझरी पोलिसांनी फसवणुकीचा गुन्हा दाखल केला आहे. (प्रतिनिधी)