BJP, Dawood Ibrahim: भारतीय जनता पक्ष स्वतःला जगातील सर्वात मोठा पक्ष समजतो. पण शक्तीशाली असल्याचा आव आणणारा पक्ष कुणालाही पक्षात प्रवेश देत आहे. आतापर्यंत ज्यांच्यावर भ्रष्टाचाराचे आरोप भाजपाने केले, त्यांनाच आता सन्मानाने पक्ष प्रवेश देऊन मंत्रीपदही दिले. आता तर भाजपाने सर्व तारतम्य सोडून दिले आहे. ज्या व्यक्तीवर अंडरवर्ल्ड डॉन दाऊद इब्राहिमशी संबंध असल्याचे आरोप केले, त्यालाच सन्मानाने पक्षप्रवेश दिला आहे. त्यामुळे आता भाजपा दाऊदलाही पक्षात प्रवेश देणार का?" असा संतप्त सवाल महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी विचारला.
"कोणाला पक्षात प्रवेश द्यावा हा त्या पक्षाचा प्रश्न आहे. पण हिंदुत्वाच्या गप्पा मारताना आपण काय करत आहोत, याचे भानही भाजपाला राहिलेले नाही. भाजपा आमदार नितेश राणे यांनी विधिमंडळात नाशिकच्या सुधाकर बडगुजर यांनी दाऊदचा गुंड सलीम कुत्तासाठी पार्टी दिली होती, असा गंभीर आरोप केला होता. पार्टीत नाचतानाचे त्याचे फोटो विधानसभेत दाखवून कारवाईची मागणी केली होती. पण आता मात्र त्यांनी त्यांचे हिंदुत्व मान्य केले, त्यांचे स्वागतच आहे असेही म्हणाले. याचाच अर्थ उद्या दाऊदलाही पक्षप्रवेश देऊन त्याने हिंदुत्व मान्य केले असेच म्हणणार का?" असा रोखठोक प्रश्न सपकाळ यांनी उपस्थित केला.
"भाजपा हा पक्ष ‘पार्टी विथ डिफरन्स’ म्हणवतो. पण आज या पक्षात गुंड, मवाली, भ्रष्टाचारी यांचा प्रवेश झाला आहे. मुंबईतील ११९३च्या बॉम्बस्फोटातील आरोपी व दाऊदचा साथीदार इक्बाल मिर्ची याच्याशी संपत्ती व्यवहार प्रकरणी माजी मंत्री प्रफुल्ल पटेल यांच्या राष्ट्रवादी पक्षाशी भाजपा सत्तेत भागीदारी करतो. प्रफुल्ल पटेलांना वॉशिंग मशीनमध्ये धुऊन स्वच्छ करतो. भाजपाचे हिंदुत्व बेगडी आहे, हे आम्ही सातत्याने सांगतो. तेच आजही दिसले," असे सपकाळ म्हणाले.
सुधाकर बडगुजर यांचा पक्षप्रवेश होणार आहे, हे पक्षाच्या प्रदेशाध्यक्ष व कार्याध्यक्षांनाही दुपारपर्यंत माहित नव्हते. पण त्यांना पक्षप्रवेशाला यावे लागले. यावरून भाजपा पक्ष नक्की कोण चालवतो, हा खरा प्रश्न निर्माण झाला आहे.