"अजित पवारांसोबत नेहमी सोबत असणारा पीए त्या दिवशी विमानात का नव्हता?", राष्ट्रवादीच्या खासदाराने उपस्थित केली नवी शंका

अजित पवार यांचा विमान अपघातात मृत्यू झाला. त्यांच्या अपघाती निधनाबद्दल अनेक प्रश्न आणि शंका उपस्थित केल्या जात आहे. अजित पवारांच्या पक्षातील नेत्यांबरोबरच शरद पवार गटातील खासदाराकडून वेगळाच मुद्दा मांडण्यात आला आहे. 

"ज्यावेळी विमान अपघात झाला, त्यावेळी विमानात अजित पवारांचा पीए का नव्हता? मी संशय व्यक्त केला आहे, आरोप केलेला नाही. याची चौकशी व्हायला हवी. मी मुख्यमंत्री आणि गृहमंत्र्यांनाही भेटणार आहे. अजित पवार माझ्या जिल्ह्याचे पालकमंत्री होते", अशी नवीन शंका उपस्थित करत राष्ट्रवादी काँग्रेसचे (शरद पवार) खासदार बजरंग सोनावणे यांनी चौकशीची मागणी केली आहे. 

"विमानात अजित पवारांसोबत पीए का नव्हता? मी समोरासमोर जाऊन बोलणारा माणूस आहे. नेहमी सोबत असणारे पीए त्यादिवशी कुठे गेले होते? त्या दिवशी फक्त सुरक्षारक्षकच सोबत होते. मी फक्त संशय व्यक्त केला आहे. याबाबत मी संसदेत प्रश्न उपस्थित करणार आहे. मुख्यमंत्र्यांना भेटणार आहे. या सर्व प्रकरणाची सखोल चौकशी व्हायला पाहिजे", अशी भूमिका खासदार बजरंग सोनवणे यांनी मांडली. 

अमोल मिटकरींच्या प्रश्नांवर काय म्हणाले? 

"प्रत्येकाच्या मनामध्ये इच्छा आहे की, चौकशी झाली पाहिजे. यामध्ये राजकारण कोणीही करत नाही, असं मला वाटत आहे. संशय व्यक्त करणे यात गैर काय? आता याबाबत सीआयडीकडे देखील तपास दिलेला आहे. आम्ही केंद्रीय गृहमंत्री अमित शहा यांना देखील याबाबत भेटू", असे खासदार सोनवणे मिटकरींकडून उपस्थित केल्या जात असलेल्या मुद्द्यांबद्दल म्हणाले. 

विलिनीकरणाचे काय होणार?

दोन्ही राष्ट्रवादी काँग्रेसच्या विलिनीकरणाच्या मुद्द्यावर खासदार सोनवणे म्हणाले, "याबाबत अजित पवारांनी सुनील तटकरे यांच्याशी चर्चा केली नसेल, याबाबत मी कसं काय सांगू? कुणी काय बोलावं ह्या ज्याचा त्याचा प्रश्न आहे, मी काय बोलावं हा माझा अधिकार आहे. विलीनीकरण हे शरद पवारांच्या अखात्यारीत आहे. याबाबत मी उत्तर देऊ शकत नाही", अशी भूमिका त्यांनी मांडली.