मुंबई - तुकाराम मुंढे अन् बदली हे जणू समीकरणच बनले आहे. प्रशासकीय सेवेतील एक धडाकेबाज अधिकारी म्हणून मुंढेंचा उल्लेख केला जातो. कडक, शिस्तप्रिय आणि धोरणी स्वभावामुळेच मुंढे अन् स्थानिक राजकीय नेते असा वाद रंगतो. शासन अन् प्रशासनाच्या या वादातूनच मुंढेंच्या बदलीचा प्रवास सुरू होतो. मुंढें यांची त्यांच्या 12 वर्षांच्या प्रशासकीय सेवेतील ही बारावी बदली आहे.
ते आले, त्यांनी जोमाने काम केले अन् त्यांची बदली झाली, असे तुकाराम मुंढेंच्या बाबतीत म्हटल्यास वावगं ठरणार नाही. कारण, गेल्या 12 वर्षांच्या कार्यकाळात त्यांची बारा वेळेस बदली करण्यात आली आहे. सन 2005 च्या बॅचचे आएएएस असलेल्या मुंढेनी सोलापूर जिल्ह्यातून आपल्या प्रशासकीय कामाला सर्वप्रथम सुरुवात केली. विशेष म्हणजे सोलापूर येथे प्रोबेशनरी म्हणून ते रुजू झाले होते. त्यानंतर, मेळघाटातील धारणी या आदिवासी भागात प्रकल्प अधिकारी म्हणून त्यांची बदली झाली. त्यानंतर, नांदेडचे उपजिल्हाधिकारी म्हणून ते नियुक्त झाले. तर 2008 साली नागपूर जिल्हा परिषदेवर सीईओ म्हणून त्यांनी कार्यभार स्विकारला. नागपूरवरुन 2009 मध्ये थेट नाशिकला ‘अतिरिक्त आदिवासी आयुक्त’ पदावर त्यांची बदली करण्यात आली. त्यानंतर, मुंबईत केव्हीआयसीच्या सीईओ पदाचा पदभार त्यांनी घेतला.
मुंबईनंतर पुन्हा जालना येथे जिल्हाधिकारी म्हणून ते रुजू झाले. त्यानंतर 2011-12 साली त्यांची सोलापूरच्या जिल्हाधिकारीपदी बदली करण्यात आली आहे. त्यामुळे दुसऱ्यांदा सोलापूरकरांना त्यांचा सहवास लाभला. त्यानंतर, 2012 मध्ये मुंबईच्या विक्री व कर विभागाच्या सह आयुक्तपदी त्यांनी पदभार स्विकारला. तर 2016 मध्ये नवी मुंबई महापालिकेत आयुक्त झाले. तेव्हापासून त्यांची चारवेळा बदली करण्यात आली आहे. नवी मुंबईतून त्यांची बदली केल्यानंतर 29 मार्च 2017 साली त्यांना पुणे पीएमपीएमएलच्या अध्यक्षपदाची सुत्रे देण्यात आली. तेथून त्यांची थेट नाशिकचे आयुक्त म्हणून बदली करण्यात आली. आता, नाशिकहूनही त्यांची बदली करण्यात आली आहे. मात्र, अद्याप त्यांना कुठलाही पदभार देण्यात आला नाही. त्यामुळे सोलापूरपासून बदलीचा प्रवास सुरू केलेल्या मुंढेंना सरकार आता तुकाराम मुंढेंना कोठे पाठवणार हे, सध्यातरी गुलदस्त्यातच आहे.