'उद्धव ठाकरेंना गर्दीचं मतांमध्ये परिवर्तन करण्यात यश', शरद पवार राज ठाकरेंबद्दल काय म्हणाले?

Uddhav Thackeray Raj Thackeray: गेल्या काही महिन्यांपासून उद्धव ठाकरे आणि राज ठाकरे एकत्र येण्याच्या चर्चांना हवा मिळत आहेत. गेल्या काही दिवसांत यादृष्टीने राजकीय विधाने झाल्याने राजकीय वर्तुळात तर्कविर्तक लावले जात आहेत.

Sharad Pawar Uddhav Thackeray Raj Thackeray: ठाकरे बंधू अर्थात उद्धव ठाकरे आणि राज ठाकरे एकत्र येणार या चर्चांचा पुन्हा एकदा धुरळा उडताना दिसत आहे. शिवसेनेचे (युबीटी) पक्षप्रमुख उद्धव ठाकरे यांनी केलेल्या एका विधानाने या चर्चेला जास्त हवा दिली. त्यामुळे मनसे अध्यक्ष राज ठाकरे आणि उद्धव ठाकरे एकत्र येणार का? या प्रश्नाभोवती चर्चांनी फेर धरला आहे. मनसे-शिवसेनेच्या युतीच्या चर्चा होत असताना शरद पवारांनी दोन्ही नेत्यांबद्दल मत मांडलं आहे. 

'लोकमत'चं WhatsApp चॅनल फॉलो करा!

टीव्ही ९ने याबद्दलचे वृत्त दिले आहे. पत्रकारांशी चर्चा करताना शरद पवारांनी मनसे अध्यक्ष राज ठाकरे आणि शिवसेनेचे (युबीटी) पक्षप्रमुख उद्धव ठाकरे यांच्या राजकीय नेतृत्वाबद्दल भाष्य केले. दोन्ही नेते एकत्र येण्याबद्दल बोलणं टाळताना शरद पवारांनी त्यांच्या नेतृत्व गुणांवर मत मांडले. 

उद्धव ठाकरे, राज ठाकरेंबद्दल पवार काय बोलले?

या गप्पांवेळी शरद पवार म्हणाले की, 'आतापर्यंतचा अनुभव असा आहे की, राज ठाकरेंच्या सभांना गर्दी होते. पण, मते मिळत नाहीत. दुसरीकडे उद्धव ठाकरेंना गर्दीचे मतांमध्ये परिवर्तन करण्यात यश येते.'

मविआ एकत्र निवडणूक लढवणार?

राज्यात महापालिका आणि स्थानिक स्वराज्य संस्था निवडणुकांचे वारे वाहू लागले आहे. महायुतीतील तिन्ही पक्षांनी निवडणुकीची तयारी सुरू केली आहे. सत्तेतील तिन्ही पक्षांचे नेते स्थानिक स्वराज्य संस्था निवडणुकीवर लक्ष्य केंद्रीत करुन काम करताना दिसत आहे. या निवडणुका महायुती एकत्र लढणार की, स्वबळावर हे चित्र अजूनही स्पष्ट झालेले नाही. 

वाचा >>राज ठाकरे मविआत सामील होणार की केवळ उद्धवसेनेशी युती करणार? सुप्रिया सुळेंचे विधान चर्चेत

दरम्यान, शरद पवारांनी महाविकास आघाडीने स्थानिक स्वराज्य संस्थांच्या निवडणुका एकत्र लढवाव्यात अशी भूमिका मांडली आहे. पत्रकारांशी गप्पा मारताना शरद पवार म्हणाले, 'माझी इच्छा आहे की, महाविकास आघाडी म्हणून स्थानिक स्वराज्य संस्थांच्या निवडणुका एकत्र लढवाव्यात.'