ज्येष्ठ नेते शरद पवार हे पत्नी प्रतिभा पवार यांच्यासह बुधवारी सायंकाळी बारामतीमधील सहयोग सोसायटीमधील निवासस्थानी राज्याच्या उपमुख्यमंत्री सुनेत्रा पवार यांची भेट घेण्याकरीता पोहोचले होते. यावेळी निवासस्थानी पोहचल्यावर शरद पवार यांनी अजित पवार यांच्या प्रतिमेला पुष्प अर्पण करीत हात जोडले. यावेळी उपमुख्यमंत्री सुनेत्रा पवार यांचे डोळे पाणावले,यावेळी हा भावनिक क्षण अनुभवताना उपस्थितांना गहिवरुन आल्याने वातावरण भावनिक झाल्याचे चित्र होते.
सुनेत्रा पवार यांनी शपथ घेतल्यानंतर शरद पवार यांनी त्यांना पहिल्यांदाच भेटत सांत्वन केले. आज पहिल्यांदाच शरद पवार आणि सुनेत्रा पवार आमने-सामने आले होते. बुधवारी संपुर्ण पवार कुटुंबिय सहयोग निवासस्थानी उपस्थित होते. यावेळी पार्थ पवार, जय पवार, राजेंद्र पवार, श्रीनिवास पवार, रणजित पवार, विजया पाटील, निता पाटील, आणि आमदार रोहित पवार, युगेंद्र पवार देखील सुनेत्रा पवार यांच्या भेटीसाठी उपस्थित होते. ज्येष्ठ नेते पवार यांना आतमध्ये आणण्यासाठी पार्थ पवार प्रवेशद्वारापर्यंत गेले होते.
थरथरत्या पावलांनी पोहचलेल्या पवार यांनी थरथरत्या हातांनीच अजित पवार यांना हात जोडले. यावेळी उपस्थितांना गहिवर अनावर झाला. त्यानंतर ज्येष्ठ नेते पवार, उपमुख्यमंत्री सुनेत्रा पवार यांच्यासह उपस्थित अन्य पवार कुटुंबियांनी दिवंगत उपमुख्यमंत्री अजित पवार यांना आदरांजली अर्पण करण्यासाठी राज्याच्या कानाकोपऱ्यातून आलेले पदाधिकारी, कार्यकर्ते यांची भेट घेत त्यांच्या सहवेदना स्वीकारल्या. पवार कुटुंबाने नेहमीच कुटुंबापासून राजकारण दुर ठेवले. आज देखील अजित पवार यांच्या अकाली एक्झिटनंतरच्या या कठीण काळात दोन्ही राष्ट्रवादी काँग्रेस पक्ष एकत्र येण्यावरुन राज्यात राजकीय वातावरण तापलेले असतानाच पवार कुटुंबाचा एकोपा बारामतीकरांनी पुन्हा एकदा अनुभवला. तसेच आमदार मिलिंद नार्वेकर यांनी पवार कुटुंबाची भेट घेत सांत्वन केले.
दरम्यान, आज आत्महत्याग्रस्त शेतकऱ्यांच्या मुला-मुलींसाठी असलेल्या आधारतीर्थ आश्रमातील काही निराधार अनाथ चिमुकल्यांनी उपस्थित राहत अजित पवार यांना श्रध्दांजली अर्पण केली. या चिमुकल्यांनी निरागस भावनेने यावेळी अजितदादांच्या प्रतिमेच हात जोडत श्रद्धांजली अर्पण केली. चिमुकल्यांच्या हृदयस्पर्शी श्रद्धांजलीने अजित पवार यांना निराधारांविषयी असलेला जिव्हाळा अधोरेखित झाला.
Web Summary : Sharad Pawar, with his wife, visited Sunetra Pawar in Baramati to offer condolences after Ajit Pawar's death. Sunetra was emotional. The Pawar family gathered, showcasing unity during this difficult time. Even children from an orphanage paid tribute, highlighting Ajit Pawar's compassion.
Web Summary : शरद पवार, अपनी पत्नी के साथ, अजित पवार के निधन के बाद बारामती में सुनेत्रा पवार को सांत्वना देने पहुंचे। सुनेत्रा भावुक हो गईं। पवार परिवार इस कठिन समय में एकजुटता दिखाते हुए एकत्र हुआ। अनाथालय के बच्चों ने भी श्रद्धांजलि दी, जो अजित पवार की करुणा को दर्शाता है।