संगीत नाटक अकादमीचे युवा पुरस्कार जाहीर

संगीत-नाटक अकादमीचे २०१२ या वर्षासाठीचे उस्ताद बिस्मिल्ला खान युवा पुरस्कार जाहीर झाले आहेत. यात सावनी तळवलकर,नंदेश उमप,गणेश चंदनशिवे,भुवनेश कोमकली आदिंचा समावेश आहे.

सावनी तळवलकर,नंदेश उमप, गणेश चंदनशिवे, भुवनेश कोमकलीचा समावेश
नवी दिल्ली: संगीत-नाटक अकादमीचे २०१२ या वर्षासाठीचे उस्ताद बिस्मिल्ला खान युवा पुरस्कार जाहीर झाले आहेत. यात सावनी तळवलकर,नंदेश उमप,गणेश चंदनशिवे,भुवनेश कोमकली आदिंचा समावेश आहे.
संगीत नाटक अकादमीच्या वतीने २००६ सालापासून युवा कलाकारांच्या प्रतिभेला प्रोत्साहन मिळावे यासाठी दरवर्षी राष्ट्रीय पातळीवर उस्ताद बिस्मिल्ला खान युवा पुरस्कार दिले जातात. पंचवीस हजार रु पये रोख, सन्मानचिन्ह आणि मानपत्र असे या पुरस्कारांचे स्वरूप आहे. पुरस्कार वितरण समारंभ लवकरच आयोजित करण्यात येणार आहे.
यावर्षी संगीत विभागात हिंदुस्थानी शास्त्रीय गायनासाठी भुवनेश कोमकली आणि कुमार सोमनाथ, शास्त्रीय वादन सावनी सुरेश तळवलकर (तबला), रंजनीआणि गायत्री बालसुब्रमण्यम तसेच गायत्री गिरीश (कर्नाटक संगीत), एन.गुरूप्रसाद (घट्म वाद्य), बी. सी. मंजुनाथन (मृदंग),अनिरु द्ध आत्रेय (खंजिरी वाद्य)यांना पुरस्कार जाहीर झाले आहेत. नृत्य विभागात उमा नारायण (भरतनाट्यम), अनुज मिश्रा (कथ्थक), कलामंडलम हरीहरन (कथकली), सिनम बासू सिंग (मणीपुरी), वेदांतम शास्त्री (कुचीपुडी), युधिष्ठिर नायक (ओडीसी) आदी कलाकारांचा समावेश आहे. नाटक विभागासाठी नलिनी नायक आणि आशिष निजावान (दिग्दर्शन), जिस्वर कुमार, आदिती बिस्वास, हॅपी रणजित (अभिनय) या कलाकारांना गौरवण्यात येणार आहे. (लोकमत न्यूज नेटवर्क)