नागपूर : महाराष्ट्रात समांतर वीज वितरण व्यवस्थेच्या दिशेने पावले टाकली जात आहेत. महावितरणने मुंबई शहरातील वीज वितरणासाठी परवान्याची मागणी केल्यानंतर आता नागपूर, पुणे, ठाणे आदी शहरांमध्येही खासगी कंपन्यांना परवाने देण्याची प्रक्रिया सुरू झाली.
महाराष्ट्र प्रदेश नियामक आयोगाने नोटीस जारी करीत खासगी कंपन्यांना परवान्यासाठी पात्र ठरवत २२ जुलैला ऑनलाइन सुनावणी घेण्याची घोषणा केली. या खासगी कंपन्यांना परवाना मिळाल्यास महावितरणचा एकाधिकार मोडीत निघणार आहे. ही कृती म्हणजे ऊर्जा क्षेत्राच्या खासगीकरणाच्या दिशेने पाऊल असल्याची टीका होऊ लागली आहे.
टोरंट पॉवरने नागपूरसह परिसरातील तसेच पुणे येथील वीज वितरणासाठी परवान्याची मागणी केली. यासाठी नोव्हेंबर २०२२ मध्ये आयोगाकडे याचिका दाखल केली आहे.
८ जानेवारी २०२३ रोजी आयोगाने नोटीस प्रकाशित करीत नागरिकांकडून सूचना व आक्षेप मागविले. याच प्रकारचा एक अर्ज अदानी इलेक्ट्रिसिटीने ठाणे, नवी मुंबई आदी भागांसाठी केला होता. आयोगाने आज नोटीस जारी करीत टोरंट व अदानीच्या अर्जावर २२ जुलैला जनसुनावणीची घोषणा केली.
कोणत्या कंपनीने कुठे परवाने मागितले?
महावितरण : मुंबई शहर व मीरा-भाईंदर मनपा क्षेत्र
टोरंट पॉवर : नागपूर, पुणे, पिंपरी-चिंचवड,बारामती, इंदापूर, दौंड, सासवड, रांजणगाव, चाकण, कुरकुंभ, वसई, विरार, कल्याण, डोंबिवली, उल्हासनगर, ठाणे मनपा क्षेत्र.
अदानी : मुलंड, भांडुप, ठाणे, नवी मुंबई, पनवेल, खारघर, तळोजा व उरण.
अर्जाना हिरवा झेंडा
आयोगाने म्हटले की, टोरंट पॉवर व अदानी इलेक्ट्रिसिटी वीज वितरणासाठी पात्र ठरले. त्यांना परवाना देण्यासाठी प्रस्तावित केले आहे. आयोगाने या निर्णयावर १६ जुलैपर्यंत आक्षेप व सूचना मागविल्या. कंपन्यांना यावर तीन दिवसात उत्तर द्यायचे आहे. २२ जुलैला यासंदर्भात ऑनलाइन सुनावणी होईल.