पार्थ.. जनतेचा विश्वास ‘सार्थ’ ठरवावा लागेल..! 

साहेबांनी माढ्यातून माघार घेतली आणि त्याचवेळी मावळमधील लोकसभेचे उमेदवार म्हणून पार्थ पवार यांच्या नावाची घोषणा केली...पार्थ यांची उमेदवारी काही जणांना अपेक्षित असेल तरी साहेबांची माढ्यातून माघार घेणे अनपेक्षित होते.कारण...यावेळी साहेबांनी त्यांच्या आयुष्यातल्या सर्वात मोठ्या दिवास्वप्नाचा  ‘ त्याग ’ होता....'

शरद पवार यांनी ज्यांच्यासाठी निवडणूक लढवणे टाळले ते पार्थ पवार म्हणजे फार मोठी राजकीय समज असलेले कोणी  असेल असे कोणाला वाटत असेल तर त्याची फसगतच होईल. २८ वर्षांचा एक साधा युवक, वाणिज्य शाखेचे पदवीपर्यंतचे शिक्षण व व्यवसायाने बांधकाम व्यावसायिक ही त्यांची ओळख. मात्र घराण्याची ओळख पाठीशी असल्याने त्यांनी एकदमच मोठी राजकीय संधी मिळत आहे. राष्ट्रवादीचे नेते अजित पवार यांचे चिरंजीव, माजी खासदार पद्मसिंह पाटील यांचे भाचे ही त्यांची ओळखच आता त्यांच्यासाठी महत्वाची ठरली आहे. शरद पवार यांनी काही दिवसांपुर्वीच पार्थ निवडणूक लढवणार नाही असे जाहीर केले होते. त्यानंतर लगेचच त्यांनी घुमजाव करत पार्थचा विचार करावा लागेल असे म्हणत स्वत: मात्र माढा मतदारसंघातून माघात घेत असल्याचे जाहीर केले. दरम्यानच्या काळात पवार कुटुंबियात काय घडले याची चर्चा आता राज्यात सर्वत्र होत आहे. पार्थ यांना हे सगळे मागे सारून पुढे यावे लागले. कार्यकर्त्यांचे मोहोळ मागे उभे आहे तेसुद्धा अजित पवार यांच्यामुळे हे त्यांना लक्षात घ्यावे लागेल. अन्य राजकीय वारसदारांप्रमाणे पार्थ यांनी राजकारणात अजून उल्लेखनीय असे काहीही केलेले नाही. ही कोरी पाटी त्यांना फायद्याची आहे तसेच तोट्याचीही! तीन पिढ्यांचा राजकीय वारसा समर्थपणे चालवू असा विश्वास निर्माण न करताच ते राजकारणात मोठी उडी घेत आहेत. आतापर्यंतचे त्यांचे काम म्हणजे  पुणे जिल्हा शिक्षण मंडळ, जिल्हा मध्यवर्ती सहकारी बँक, बारामती विधानसभा मतदारसंघात कार्यकर्त्यांच्या बैठका घेणे, कामांची आखणी करणे या स्वरूपाचे आहे.  थेट राजकारणात उडी घेऊन लगेचच लोकसभेची निवडणुक लढवणे सोपे नाही हे त्यांना आता जाणवेलच. कार्यकर्त्यांच्या गर्दीपेक्षाही मतदारांचा विश्वास मिळवणे त्यांच्यासाठी महत्वाचे आहे. अजित पवार यांच्यासारखे दिसत असले तरी पार्थ यांचा स्वभाव मात्र त्यांच्यापेक्षा वेगळा असल्याचे सांगितले जाते. त्वरीत रिअ‍ॅक्ट न होणे, मोठ्याने न बोलणे, समोरच्याचे ऐकणे हे गूण त्यांच्यात असल्याचे कार्यकर्ते म्हणतात. राजकीय नेत्यांसारखे तर ते मुळीच दिसत नाही. त्यातही वाचनांची त्यांना आवड आहे. त्यामुळे राजकारणाची घाईगडवड त्यांच्या कितपत अंगवळणी पडेल याची शंकाच कार्यकर्त्यांमध्ये असेल. ती दूर करण्याचा प्रयत्न पार्थ यांना करावा लागेल. मात्र तेवढयाने भागेल असे नाही. पवार कुटुंबातील असल्याने आता त्यांच्याकडे सर्वांचे लक्ष असेल. जाहीर सभांमध्ये त्यांना ऐकले जाईल. सातत्याने कुटुंबातील कोणाशी तरी तुलना केली जाईल.  वागण्या बोलण्यात थोडे जरी काही चुकले तरी त्याचा बाऊ केला जाईल. या मतदारांचा विश्वास मिळवण्यासाठी त्यांना ‘पार्थ पवार’ अशी स्वत:ची वेगळी ओळख निर्माण करावी लागेल. तरच त्यांना पुढे जाणे जमेल. वाटचाल सोपी नाही एवढे त्यांनी लक्षात घ्यायला हवे.