AI Pandharpur Wari: आता पंढरीच्या वारीतही 'एआय दिंडी' पाहायला मिळणार!

Pandharpur Wari 2025: लोकांना सोयीच्या कोणत्याही दिवशी कोणत्याही टप्प्यात सहभागी होता येईल, अशी व्यवस्था आयोजकांनी विकसित केली.

पुणे: आता पंढरीच्या वारीतही कृत्रिम बुद्धिमत्ता अर्थात ‘एआय’ दिंडी पाहायला मिळणार आहे. यात ऑल इन्क्लुसिव्ह दिंडी, (विविध भाषा, प्रांत, वय आणि नोकरी/व्यवसायांतील लोकांना सामावून घेणारी), कृत्रिम  बुद्धिमत्तेचा वापर, आध्यात्मिक इंटेलिजन्स (नव्या पिढीत आध्यात्मिक जाणीव वाढवण्याचा एक प्रयत्न) आणि एआय म्हणजे मराठीत ‘आई’ अर्थात ‘माउली’ (भक्तांना आधार देणारी, प्रेमळ शक्ती) अशा 'एआय'च्या घटकांचा खुबीने वापर करण्यात आला आहे. परंपरेची ओळख सांगणारी व नव्या पिढीसाठी प्रेरणादायी ठरणारी ही दिंडी यंदाच्या वारीचे आकर्षण ठरणार आहे.

अनेकांना वाटते की, फक्त आयटी क्षेत्रातीलच लोक या दिंडीत सहभागी होऊ शकतात का? घरातील अन्य व्यक्ती चालतील का? मी गृहिणी आहे अथवा निवृत्त आहे, मला सहभागी होता येईल का... इ. यासाठी अधिकाधिक लोकांना वारीमध्ये सहभागी करून त्यांना संस्कृतीची, वारकरी संप्रदायाची ओळख करून देणे आणि अद्भुत आध्यात्मिक अनुभवाची सुलभता निर्माण करणे या उद्देशाने वारीच्या पुणे ते पंढरपूर या टप्प्यांसाठी 'एआय दिंडी' या नावाने सेवा द्यायचे या टीमने ठरवले आहे.

एआय दिंडी काय करते?
लोकांना सोयीच्या कोणत्याही दिवशी कोणत्याही टप्प्यात सहभागी होता येईल, अशी व्यवस्था आयोजकांनी विकसित केली आहे. ज्या दिवशी ज्या टप्प्यावर पालखी आहे, त्या ठिकाणी जाण्यासाठी पुण्याहून बसची व्यवस्था केली आहे. तसेच पुन्हा पुण्यात सोडण्याचीही व्यवस्था आयोजकांकडून करण्यात आली आहे. वारीत चालताना आपल्याला अभंग म्हणता यावेत, टाळ वाजवता यावा, पावले खेळता यावीत यासाठी एआय दिंडी पुण्यातील वेगवेगळ्या ठिकाणी प्रशिक्षण शिबिरे ‘भजनसंध्या आणि वारीतील खेळ’ आयोजित करते.