ठाकरे बंधू एकत्र येण्याच्या चर्चा असतानाच उद्धवसेना-मनसेला खिंडार; अनेक पदाधिकारी शिंदे गटात सामील

Shiv Sena Shinde Group News: आगामी महापालिका, स्थानिक स्वराज्य संस्थांच्या निवडणुकांच्या पार्श्वभूमीवर शिवसेना शिंदे गटाची ताकद वाढत असून, ठाकरे गटाला एकामागून एक धक्के बसत आहेत. 

Shiv Sena Shinde Group News: विधानसभा निवडणुकीनंतर ठाकरे गटाला पडलेले खिंडार अधिकच विस्तारत असल्याचे पाहायला मिळत आहे. एकीकडे पदाधिकारी, नेते, कार्यकर्ते पक्ष सोडून जात असताना, ठाकरे गटातीलच अनेक जण नाराज असल्याचे चित्र पाहायला मिळत आहे. संपूर्ण राज्यभरातून ठाकरे गटाला गळती लागल्याचे दिसत आहे. अनेक वर्षे पक्षात कार्यरत असलेले पदाधिकारी, नेते उद्धव ठाकरेंना जय महाराष्ट्र करत, शिवसेना शिंदे गटात सामील होत आहे. त्यामुळे आगामी महापालिका, स्थानिक स्वराज्य संस्थांच्या निवडणुकांच्या पार्श्वभूमीवर शिवसेना शिंदे गटाची ताकद वाढत असून, ठाकरे गटाला एकामागून एक धक्के बसत आहेत. 

पुणे जिल्ह्यातील मंचर, अहिल्यानगर तसेच ठाणे जिल्ह्यातील उल्हासनगर येथील ठाकरे गट, राष्ट्रीय काँग्रेस, मनसे आणि रिपब्लिकन पक्षाच्या पदाधिकाऱ्यांनी शिवसेना पक्षात जाहीर प्रवेश केला. यावेळी त्यांचे पक्षात स्वागत करून त्यांना भावी सामाजिक आणि राजकीय वाटचालीसाठी शुभेच्छा दिल्या, अशी माहिती उपमुख्यमंत्री एकनाथ शिंदे यांनी एक्सवर एक पोस्ट करून दिली आहे. 

पुण्यातील रिपब्लिकन चर्मकार महासंघाचे अध्यक्ष संजुभाऊ बनसोडे आणि त्यांची संपूर्ण कार्यकारिणी तसेच मंचर तालुक्यातील ठाकरे गटाचे तालुकाप्रमुख आणि आदर्श सरपंच दत्ता गांजळे, ठाकरे गटाचे मंचर शहरप्रमुख विकास जाधव, सुवर्णा डोंगरे तसेच ग्रामपंचायतीतील सर्व सदस्यांनी शिवसेनेमध्ये जाहीर प्रवेश केला. उल्हासनगरमधील राष्ट्रीय काँग्रेस पक्षाच्या माजी महिला अध्यक्ष व माजी उपमहापौर जया साधवानी आणि त्यांचे पती माजी नगरसेवक आणि राष्ट्रीय काँग्रेसचे कार्याध्यक्ष रमेश साधवानी यांनी शिवसेनेत जाहीर प्रवेश केला.

दरम्यान, अहिल्यानगर मनसेचे जिल्हाध्यक्ष बाळासाहेब माळी तसेच पारनेर आणि जामगावचे ठाकरे गट, मनसेचे पदाधिकारी, माजी नगरसेवक अनिल शेंडगे, माजी पंचायत समिती सभापती नंदा शेंडगे, माजी नगरसेवक अर्जुन शेट्टे, सोमनाथ खांदे, चैतन्य उद्योग समुहाचे अध्यक्ष गणेश पाटील, ठाकरे गटाचे माजी तालुकाप्रमुख डॉ. नितीन तोरडमल यांनीही शिवसेनेमध्ये प्रवेश केला, अशी माहिती देण्यात आली आहे.