मुंबई - राज्यातील सत्तासंघर्ष सर्वोच्च न्यायालयात पोहोचला असताना शिवसेना, काँग्रेस, राष्ट्रवादी काँग्रेस आणि सहयोगी पक्षाच्या महाविकास आघाडीने सोमवारी मुंबईत 162 आमदारांचे जोरदार शक्तीप्रदर्शन केले. महाविकास आघाडीने अपक्ष व सहयोगी पक्षांसह 162 आमदारांच्या संख्याबळावर राज्यात तत्काळ सरकार स्थापन करण्याची संधी द्यावी, अशी विनंती करणारे पत्र राजभवनात सादर केले आहे. शिवसेना नेते संजय राऊत यांनी एक सूचक विधान केलं आहे.
संजय राऊत यांनी मंगळवारी (26 नोव्हेंबर) आपल्या ट्विटर अकाऊंटवरून '162 आणि अधिक... वेट अँड वॉच' असं सूचक ट्विट केलं आहे. राज्यातील सत्ता नाट्याचा नवा अंक सोमवारी ग्रँड हयात हॉटेलमध्ये पार पडला. महाविकास आघाडीच्या 162 आमदारांची तिन्ही पक्षाच्या प्रमुख नेत्यांसमोर ओळखपरेड करण्यात आली. तसेच संविधान दिनाच्या पूर्वसंध्येला संविधानाच्या रक्षणासह मतदारसंघ आणि पक्षाशी एकनिष्ठ राहाण्याची शपथ देण्यात आली. बहुमत नसतानाही मणिपूर, गोवा या राज्यात भाजपने सत्ता स्थापन केली. पण हा गोवा नाही, महाराष्ट्र आहे. आमच्यावर काही चुकीचे लादले तर त्याला उत्तर देण्याची ताकद या महाराष्ट्रात आहे, असा सज्जड दम खा. शरद पवार यांनी भाजपला दिला. तर कुणी आडवा आला तर त्याचे काय करायचे हे शिवसेना पाहून घेईल, असा इशारा शिवसेना पक्षप्रमुख उद्धव ठाकरे यांनी दिला.
शिवसेनेचे एकनाथ शिंदे, राष्ट्रवादीचे जयंत पाटील व काँग्रेसचे बाळासाहेब थोरात यांनी 162 आमदारांच्या सह्यांचे पत्र दिले. राज्यपाल भगतसिंह कोश्यारी दिल्लीत असल्यामुळे त्यांच्या कार्यालयात हे पत्र सादर केले. या वेळी अशोक चव्हाण, खा. विनायक राऊत, समाजवादी पक्षाचे अबू आझमी, के.पी. पाडवी आदी उपस्थित होते. 23 नोव्हेंबर रोजी देवेंद्र फडणवीस यांनी शपथ घेतली; परंतु पूर्वी विधानसभा सदस्यांचे पुरेसे संख्याबळ नसल्यामुळे सरकार स्थापण्यास असमर्थता दर्शवली होती. आजदेखील त्यांच्याकडे पुरेसे संख्याबळ नाही. ते बहुमत सिद्ध करण्यास असमर्थ ठरतील. त्यामुळे आम्ही आताच सरकार स्थापनेचा दावा करीत आहोत. शिवसेनेसह राष्ट्रवादी, काँग्रेस व सहयोगी आणि अपक्ष सदस्य यांची सह्यांनिशी यादी सोबत जोडत आहोत. सरकार स्थापन करण्यासाठी आमच्याकडे पुरेसे संख्याबळ असल्याने आम्हाला सरकार स्थापन करण्यास तत्काळ पाचारण करण्यात यावे, अशी विनंती त्यांनी राज्यपालांकडे केली आहे.
शरद पवार यांनी भाजपसह अजित पवारांना इशारा दिला. ते म्हणाले, जाणीवपूर्वक काही गैरसमज पसरविले जात आहेत. अजित पवार यांच्यावर पक्षाने कारवाई केलेली आहे. व्हीपचा धाक दाखवून आमदारकी धोक्यात येईल अशी कोणी भीती घातली जात आहे. पण पदावरून दूर केलेल्या व्यक्तीला आता कोणताही अधिकार उरलेला नाही. त्यामुळे तुमचे कोणतेही नुकसान होणार नाही. मी संसद, घटनातज्ज्ञ आणि अनेक निवृत्त वरिष्ठांकडून स्पष्टता घेतली आहे. त्यामुळे तुम्ही कसलीही काळजी करु नका. सगळी जबाबदारी मी व्यक्तीगतरित्या घ्यायला तयार आहे, अशा शब्दात पवार यांनी आमदारांना धीर दिला.
आम्ही आलोय, रस्ता मोकळा करा - ठाकरे
मी पुन्हा येणार असे मी म्हणणार नाही, पण आम्ही आलोय, आता रस्ता मोकळा करा, आणि हिंमत असेलच तर आमच्या वाटेत येऊन पहाच, मग कळेल आम्ही काय आहोत ते, अशा शब्दात शिवसेना पक्षप्रमुख उद्धव ठाकरे यांनी भाजपला इशारा दिला. ते म्हणाले, आपली लढाई सत्तेसाठी नसून सत्यमेव जयतेसाठी आहे. आज हा उत्साह पाहूनही सत्तेला चिटकून बसलेल्यांच्या डोक्यात प्रकाश पडत नसेल तर त्यांचे दुर्देव. पण आता आम्हाला जेवढे अडवण्याचे काम कराल तेवढे आम्ही घट्ट होऊ हे लक्षात ठेवा. आम्ही केवळ दोन पाच वर्षासाठी एकत्र आलो नाहीत. तर पाचचा पाढा पूर्ण करण्यासाठी आलोय. ही ताकद आणि शक्ती अशीच जपून ठेवू असे आवाहनही त्यांनी केले.