नागपूर - Vikas Thackeray on Sanjay Raut ( Marathi News ) मी कुणाचीही रसद घेण्याइतपत भिकार XX नाही. ९ व्यांदा निवडणूक लढतोय. तुम्हाला भाजपात भांडणं लावायचा धंदा दिलाय का? तुमचं नेमकं काम काय आहे? महाविकास आघाडीतला एक पक्ष अशाप्रकारे विधानं करत असेल तर काँग्रेसनं त्यांना समज द्यावी. मी वरिष्ठांना आज याविषयी पत्र लिहिणार आहे. हे लिहिण्यामागचा उद्देश काय, तुम्ही गडकरींच्या बाजूने होता का? अशा शब्दात नागपूरचे काँग्रेस नेते विकास ठाकरे यांनी संजय राऊतांचा दावा खोडून काढला आहे.
विकास ठाकरे म्हणाले की, संजय राऊत जे काही बोलतात, त्यांनी पुराव्यानिशी बोलावं, उगाच वायफळ बडबड करून प्रसिद्धीसाठी बोलू नये. गडकरींबाबत त्यांचे प्रेम काय हे निवडणुकीआधी ते बोलले होते म्हणून मी कुणालाच प्रचाराला बोलावलं नाही. त्यांना भाजपाशी काय दुखणं आहे हे त्यांनी पाहावं. परंतु महाविकास आघाडीचा धर्म त्यांनी पाळायला हवा. अन्यथा आम्हाला राऊतांविरोधात बोलायला खूप बोलू शकतो असा इशारा त्यांनी दिला.
तसेच निवडणुकीच्या तोंडावर तुम्ही गडकरींची प्रशंसा करत होते. त्यानंतर निवडणूक झाल्यावरही त्यांची प्रशंसा, गडकरींसोबत दुसरा पक्ष काढून महाविकास आघाडी करायची होती. संजय राऊतांनी बोलण्यास तारतम्य बाळगावं. नागपूरच्या विषयात त्यांना कवडीचही माहिती नाही. नागपूरची A, B, C, D ही माहिती नाही असंही विकास ठाकरेंनी सांगत उद्धव ठाकरे गटाला फटकारलं आहे. विकास ठाकरे हे काँग्रेसचे नेते असून नागपूरात नितीन गडकरींविरोधात महाविकास आघाडीचे उमेदवार म्हणून त्यांनी निवडणूक लढवली आहे.
संजय राऊतांचा दावा काय?
नितीन गडकरींचा नागपूरात पराभव व्हावा यासाठी नरेंद्र मोदी, अमित शाह आणि देवेंद्र फडणवीस यांनी एकत्र प्रयत्न केले. गडकरींचा पराभव होत नाही याची खात्री पटल्यावर फडणवीस हे नाइलाजाने नागपूरात प्रचारात उतरले. गडकरींच्या पराभवासाठी सर्व प्रकारची रसद फडणवीस यांनीच पुरवली हे संघाचेच लोक नागपूरात उघडपणे बोलताना दिसतात असा दावा खासदार संजय राऊतांनी केला.
भाजपानेही राऊतांवर साधला निशाणा
रोज उठायचं आणि खोटं बोलायचं असं राऊतांचे आहे. त्यांनी केलेला आरोप निराधार आहे. एकदा जर तुम्हाला टीव्ही चॅनेलवर रोज दिसायची सवय लागली, वर्तमानपत्रात रोज आपली बातमी, फोटो यावा हे व्यसन जडलं तर अशाप्रकारे आरोप होत असतात. या आरोपात काहीही तथ्य नाही असं सांगत भाजपा नेते सुधीर मुनगंटीवार यांनी संजय राऊतांवर निशाणा साधला.