Mumbai: जोगेश्वरी टर्मिनस डिसेंबर २०२५ पर्यंत सुरु होणार- रविंद्र वायकर

जोगेश्वरी रेल्वे टर्मिनसवरून गावाला जाण्याचे जोगेश्वरीकारांचे स्वप्न लवकरच पूर्ण होणार आहे.

मनोहर कुंभेजकर, मुंबई: जोगेश्वरी रेल्वे टर्मिनसवरून गावाला जाण्याचे जोगेश्वरीकारांचे स्वप्न लवकरच पूर्ण होणार आहे. जोगेश्वरी टर्मिनसचे काम युद्ध पातळीवर सुरु असून डिसेंबर २०२५ पासून हे टर्मिनस कार्यान्वित करण्याचा रेल्वेचा मानस आहे. मुंबई उत्त्तर पश्चिम लोकसभा क्षेत्राचे शिंदे गताचेवखासदार रविंद्र वायकर यांनी नुकतीच या टर्मिनसच्या कामाची पाहणी केली, यावेळी रेल्वेच्या अधिकाऱ्यांनी हे आश्वासन दिले. 

अमृत भारत या योजनेच्या माध्यमातून देशातील विविध रेल्वे स्टेशनचे काम करण्यात येत आहे. जोगेश्वरी येथे रेल्वेची जागा उपलब्ध असल्याने येथे टर्मिनस बनवण्यात यावे अशी मागणी खासदार रविंद्र वायकर यांनी लोकसभेत केली होती. याप्रश्नी त्यांनी रेल्वे मंत्री अश्विनी वैष्णव यांची भेट घेऊन निवेदनही दिले होते. 

या ठिकाणी एकूण ३ प्लॅटफॉर्म बांधण्यात येणार आहेत. त्याचबरोबर मालवाहतुकीसाठी वेगळा प्लॅटफॉर्म बांधण्यात येणार आहे. येथे लिफ्ट, सरकते जिने, अंडरग्राउंड पार्किंगची सुविधा, सोलर, मेट्रोची कनेक्टीव्हिटी, पूल करण्यात येणार आहे. तसेच याठिकाणी मल्टीमोडेल कनेक्टीव्हिटी सुविधाही करण्यात यावी अशी सुचना खासदार वायकर यांनी यावेळी रेल्वेच्या अधिकाऱ्यांनी केली होती. या टर्मिनसचे काम टप्प्या टप्प्याने पूर्ण करण्यात येणार असून सुरुवातीला दोन प्लॅटफॉर्म सुरु करण्यात येणार असून प्रथम राजस्थान व गुजरात येथे गाड्या सोडण्यात येणार, असल्याची माहिती रेल्वेचे अधिकाऱ्यांनी दिली. या टर्मिनसवरून कोकणात जाण्यासाठीही गाड्या सोडण्यात येणार असल्याचे खासदार वायकर यांनी यावेळी सांगितले.

या पाहणी दौऱ्यावेळी रेल्वेचे उपमुख्य अभियंता ए.के.आर्या, अमित गायकवाड, विवेक कुमार, नरसिंगराव, अमित खरवंदे, अशोक मालविया, मनपाच्या पी दक्षिण कार्यालयांचे सहाय्यक आयुक्त अजय पाटणे, ज्ञानेश्वर सावंत, माजी नगरसेवक सदानंद परब, स्वप्नील टेंबवलकर, साधना माने, रेखा रामवंशी, प्रियांका आंबोलकर, अशोक चाचे, जितेंद्र जनावळे, मिलिद कापडी, पूनम वैद्य, भाई मिर्लेकर, स्मिता बावधने, अमित पिळणकर,शिंदे सेनेचे अन्य पदाधिकारी व कार्यकर्ते उपस्थित होते.