"देवेंद्रजीसुद्धा योगीच, ते कसरत नाही पण..', अमृता फडणवीस यांचं विधान

International Yoga Day: महाराष्ट्राचे मुख्यमंत्री देवेंद्र फडणवीस यांच्या पत्नी अमृता फडणवीस यांनीही मुंबईत सफाई कामगारांसाठी आयोजित योगाभ्यासाच्या कार्यक्रमात सहभाग नोंदवला. यावेळी अमृता फडणवीस यांनी त्यांचे पती आणि महाराष्ट्राचे मुख्यमंत्री देवेंद्र फडणवीस यांच्याबाबत मोठं विधान केलं.

आज आंतरराष्ट्रीय योग दिन भारतासह जगभरात उत्साहात साजरा करण्यात आला. भारतामध्येही पंतप्रधान नरेंद्र मोदी यांच्यासह अनेक मान्यवरांनी योग दिनानिमित्त आयोजित कार्यक्रमामध्ये सहभाग घेतला. महाराष्ट्राचे मुख्यमंत्री देवेंद्र फडणवीस यांच्या पत्नी अमृता फडणवीस यांनीही मुंबईत सफाई कामगारांसाठी आयोजित योगाभ्यासाच्या कार्यक्रमात सहभाग नोंदवला. यावेळी अमृता फडणवीस यांनी त्यांचे पती आणि महाराष्ट्राचे मुख्यमंत्री देवेंद्र फडणवीस यांच्याबाबत मोठं विधान केलं.

अमृता फडणवीस म्हणाल्या की, आज इथे मुंबई महानगरपालिकेच्या सफाई कर्मचाऱ्यांसाठी आम्ही सुंदर योग शिबिराचं आयोजन केलं. या सर्वांचं योगा सत्र सुरू आहे. अधिकारी भूषण गगराणी यांच्यासह इतर काही सेलेब्रिटी उपस्थित आहेत. आम्ही सर्वांनीही त्यांच्यासोबत योगा करत आहोत. योग हा केवळ एक दिवस करायचा नाही आहे तर रोज करायचा आहे. त्यामुळे आपलं शारीरिक आणि मानसिक आयोग्य जन्मभर चांगलं राहील, असेही त्यांनी सांगितले.

यावेळी देवेंद्र फडणवीस हे खूप संयमी दिसतात, त्यामागेही योग हे कारण आहे का? असं विचारलं असता अमृता फडणवीस म्हणाल्या की, देवेंद्रजीही योगीच आहेत. कारण जेव्हा वेळ मिळतो तेव्हा ते ध्यानधारणा नेहमीच करतात. ते कसरत करत नाहीत, पण ध्यानधारणा नक्कीच करतात, अशी माहिती अमृता फडणवीस यांनी दिली.

दरम्यान, भारताचे पंतप्रधान नरेंद्र मोदी यांनी सप्टेंबर २०१४ मध्ये झालेल्या संयुक्त राष्ट्रांच्या महासभेत २१ जून हा दिवस ‘आंतरराष्ट्रीय योग दिन’ म्हणून साजरा करण्याचा प्रस्ताव मांडला होता. संयुक्त राष्ट्रांच्या १९३ देशांपैकी १७५ देशांचे सहप्रतिनिधींनी या प्रस्तावाला पाठींबा दिला होता. यावर विस्तृत चर्चा होवून डिसेंबर २०१४ मध्ये या दिनाला मान्यता देण्यात आली. २१ जून २०१५ रोजी पहिला आंतरराष्ट्रीय योग दिवस जगभर साजरा करण्यात आला. यावर्षी ११ वा योगदिन जगभरात साजरा झाला आहे.