Dharmarao Baba Atram News: राज ठाकरेंनी पाठिंबा जाहीर केल्यानंतर आता आमची ताकद वाढल्याचा विश्वास महायुतीमधील अनेक नेत्यांनी व्यक्त केला आहे. तर, सांगलीच्या जागेवरून काँग्रेस आणि ठाकरे गटातील तणाव दिवसेंदिवस वाढताना दिसत आहे. काँग्रेस पक्षातही अंतर्गत धुसपूस सुरू असल्याचे चित्र आहे. यातच आता विजय वडेट्टीवार लवकरच भाजपामध्ये जाणार आहेत. ते अशोक चव्हाण यांचे राइट हँड आहेत, असे विदर्भातील एका बड्या नेत्याने म्हटले आहे.
मीडियाशी बोलताना या नेत्याने काँग्रेसचे नेते आणि विधानसभेतील विरोधी पक्षनेते विजय वडेट्टीवार यांच्याबाबत मोठा दावा केला आहे. विजय वडेट्टीवार काँग्रेसचे विरोधी पक्षनेते आहेत. ते अशोक चव्हाण यांचे राइट हँड आहेत. विजय वडेट्टीवार यांच्या गटातील तसेच नजीकचे मानले जाणारे अनेक नेते भाजपामध्ये गेले आहेत. ही एक प्रकारची सूचक दिशा आहे की, विजय वडेट्टीवार हे भाजपामध्ये जाणार आणि ही गोष्ट १०० टक्के खरी आहे, असा मोठा दावा धर्मरावबाबा आत्राम यांनी केला आहे.
विजय वडेट्टीवार भाजपामध्ये जाण्यासंदर्भात ज्या काही बैठका, चर्चा झाल्या, त्यात मीही सहभागी होतो. त्यामुळे आज नाही तर उद्या विजय वडेट्टीवार भाजपामध्ये नक्की जाणार, असे आत्राम यांनी म्हटले आहे. या बैठकांबाबत अधिक माहिती देऊ शकत नाही. मात्र, तेही होते आणि मीही होतो, एवढेच सांगेन. या सगळ्या चर्चा माझ्यासमोर झाल्या. अशोक चव्हाण भाजपामध्ये गेल्यानंतर विजय वडेट्टीवार काँग्रेसमध्ये राहून काय करणार, तेही भाजपामध्ये जाणार, असे आत्राम यांनी सांगितले.
दरम्यान, लोकसभा निवडणुकीचा प्रचार सुरू झाल्यापासून काँग्रेस नेते विजय वडेट्टीवार, नाना पटोले, बाळासाहेब थोरात सातत्याने महायुती आणि केंद्रातील भाजपा सरकारवर निशाणा साधत आहेत. लोकसभा निवडणुकीच्या पहिल्या टप्प्यात विदर्भातील जागांवर मतदान होणार असून, महाविकास आणि महायुती यांच्याकडून विजयाचा विश्वास व्यक्त करण्यात आला आहे.