Cricketer Kedar Jadhav ( Marathi News ) : भारतीय संघाचा स्टार क्रिकेटपटू केदार जाधव हा आपल्या आक्रमक फटकेबाजीसाठी आणि अचूक गोलंदाजीसाठी ओळखला जातो. मात्र आज केदार जाधव हा एका वेगळ्या कारणासाठी चर्चेत आला आहे. केदारने आज भाजप नेते आणि राज्याचे उपमुख्यमंत्री देवेंद्र फडणवीस यांची भेट घेतली. मागील काही महिन्यांपासून केदार जाधव हा संघाबाहेर आहे. अशातच आज त्याने देवेंद्र फडणवीस यांची भेट घेतल्याने तो राजकीय क्षेत्रातही एंट्री करणार का, याबाबत तर्क-वितर्क लढवले जाऊ लागले आहेत.
मिळालेल्या माहितीनुसार, मूळचा पुणेकर असलेल्या केदार जाधव याने आज आपल्या खासगी कामासाठी उपमुख्यमंत्री देवेंद्र फडणवीसांची भेट घेतली आहे. मात्र मागील काही दिवसांतील केदार जाधव याची ही दुसरी भेट आहे. लोकसभा निवडणुकीची धामधूम सुरू असतानाच मराठमोळ्या केदारने घेतलेल्या देवेंद्र फडणवीसांच्या भेटून सर्वांचेच लक्ष वेधून घेतलं आहे. या भेटीवेळी भाजप प्रदेशाध्यक्ष चंद्रशेखर बावनकुळे, भाजपचे मुंबई अध्यक्ष आशिष शेलार हेदेखील उपस्थित होते.
दरम्यान, राष्ट्रवादी शरदचंद्र पवार पक्षाचे आमदार आणि महाराष्ट्र क्रिकेट असोसिएशनचे अध्यक्ष रोहित पवार यांच्याशीही केदार जाधवची जवळीक आहे. त्यामुळे केदार जाधव खरंच राजकीय क्षेत्रात आपली नवी इनिंग सुरू करणार का, हे पाहणं औत्सुक्याचं ठरणार आहे.
केदार जाधवची क्रिकेट कारकीर्द
अष्टपैलू खेळाडू असलेल्या केदार जाधवनं भारताकडून ७३ एकदिवसीय सामने खेळले असून १ हजार ३८९ धावा केल्या आहेत. एकदिवसीय सामन्यांत दोन शतकं आणि सहा अर्धशतके त्याच्या नावावर आहेत. केदारने नऊ आंतरराष्ट्रीय टी-२० सामन्यांत १२२ धावा केल्या आहेत. आयपीएलमध्येही केदार जाधवने आपल्या कामगिरीने सर्वांचं लक्ष वेधून घेतलं होतं. त्याने आरसीबी आणि सीएसके या संघांचं प्रतिनिधित्व केलं आहे.
दरम्यान, मागील काही काळापासून तो आयपीएल सामन्यांसाठी मराठीमध्ये समालोचन करत आहे.