Comfort The Oxford vaccine has no side effects on volunteers the municipal administration said | दिलासा;  ऑक्सफर्डच्या लसीचा स्वयंसेवकांवर दुष्परिणाम नाही, पालिका प्रशासनाने दिली अशी माहिती

दिलासा;  ऑक्सफर्डच्या लसीचा स्वयंसेवकांवर दुष्परिणाम नाही, पालिका प्रशासनाने दिली अशी माहिती

स्नेहा मोरे

मुंबई : मुंबईत मागील महिन्यात पालिकेच्या नायर आणि केईएम रुग्णालयांत आॅक्सफर्ड विद्यापीठाने तयार केलेल्या कोविड-१९ लसीची मानवी चाचणी सुरू केली. आतापर्यंत या मानवी चाचणीत एकूण १६३ स्वयंसेवकांनी सहभाग घेतला. दिलासादायक म्हणजे ही लस दिलेल्या १६३ स्वयंसेवकांवर कोणतेही दुष्परिणाम झाले नसल्याची माहिती पालिका प्रशासनाने दिली.

मुंबई पालिकेचे अतिरिक्त आयुक्त सुरेश काकाणी यांनी सांगितले की, चाचणीत सहभागी स्वयंसेवकाला प्रत्येकी एक कोटीचा आरोग्य विमा लागू आहे. शिवाय लसीचा दुष्परिणाम आढळल्यास ५० लाखांचे विमा कवच आहे. मात्र कोणावरही दुष्परिणाम दिसून आलेला नाही.

पांढऱ्या पेशी निर्माण होण्यास मदत
पालिका रुग्णालयांमध्ये लसीच्या चाचणीसाठी सहभागी झालेल्या स्वयंसेवकांचे वय २० ते ४५ या वयोगटातील आहे. आॅक्सफर्डच्या लसीमुळे स्वयंसेवकांची रोगप्रतिकारशक्ती बळकट होण्यास, तसेच या लसीच्या माध्यमातून टी-सेल म्हणजेच पांढऱ्या पेशी निर्माण होण्यास मदत होईल, जेणेकरून या पेशी कोरोनाच्या विषाणूविरोधात लढा देऊ शकतील. लसीचा डोस दिल्यानंतर १४ दिवसांत शरीरात प्रतिपिंड (अँटिबॉडी) निर्माण होणार असून त्यांची मुदत २८ दिवसांसाठी असेल. ब्रिटनमध्ये या चाचणीचा पहिला टप्पा पार पडला. केईएम व नायर रुग्णालयात होणाऱ्या मानवी प्रयोग चाचणीत प्रतिकारशक्ती क्षमता आणि लसीची सुरक्षा पडताळण्यात येईल.
 

वाचकहो, 'लोकमत'ला टेलिग्रामवर फॉलो करताय ना?... अजून जॉईन केलं नसेल तर क्लिक करा ( @LokmatNews ) आणि मिळवा महत्त्वाचे अपडेट्स अन् ताज्या बातम्या!

Web Title: Comfort The Oxford vaccine has no side effects on volunteers the municipal administration said

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.