महामुंबईतील राज्य महिला कर्मचाऱ्यांसाठी लवकरच ‘कम अर्ली-गो अर्ली’ सवलत 

उपमुख्यमंत्री सुनेत्रा पवार यांची परिषदेत घोषणा

मुंबई : मुंबई महानगर क्षेत्रातील (महामुंबई) शासकीय महिला कर्मचाऱ्यांसाठी ‘कम अर्ली-गो अर्ली’ सवलत देण्याची महत्त्वपूर्ण घोषणा उपमुख्यमंत्री सुनेत्रा पवार यांनी मंगळवारी विधानपरिषदेत केली.   

आंतरराष्ट्रीय महिला दिनानिमित्ताने झालेल्या विशेष चर्चेला उपमुख्यमंत्री पवार यांनी उत्तर दिले. त्या म्हणाल्या, ‘कम अर्ली-गो अर्ली’ या निर्णयानुसार मुंबई महानगर क्षेत्रातील महिला कर्मचाऱ्यांना सकाळी ९:१५ ते ९:४५ दरम्यान कार्यालयात उपस्थित व्हावे लागेल. महिला कर्मचारी कार्यालयात जितकी मिनिटे लवकर  येतील, तितकी मिनिटे त्यांना लवकर निघता येईल.

महिला कर्मचाऱ्यांना ३० मिनिटांची मुभा देण्यात येणार आहे. कार्यालयात अर्धा तास लवकर या आणि संध्याकाळी तेवढाच वेळ लवकर घरी जा, असे या सवलतीचे स्वरूप असेल, असे उपमुख्यमंत्री पवार यांनी स्पष्ट केले. या निर्णयामुळे गर्दीच्या वेळी महिलांची होणारी गैरसोय कमी होऊन त्यांना दिलासा मिळेल, असेही त्यांनी सांगितले. 

महिलांच्या समस्यांसाठी ५१ भरोसा सेल  महिलांच्या सुरक्षेबाबत बोलताना उपमुख्यमंत्री पवार म्हणाल्या, हरवलेल्या मुलांचा शोध घेण्यासाठी राज्यात ‘ऑपरेशन मुस्कान’ अभियानाअंतर्गत जुलै २०१५ ते फेब्रुवारी २०२६ या कालावधीत १४ मोहिमा राबवून ४२ हजार ५९४ बालकांचा शोध घेण्यात आला आहे. शोधमोहिमेतून ५ हजार ६६ महिला आणि २ हजार ७७१ बालकांचा शोध घेण्यात आला आहे. सर्व जिल्ह्यांमध्ये ‘मिसिंग सेल’ कार्यरत असून, महिलांच्या समस्यांसाठी ५१ ‘भरोसा सेल’ कार्यान्वित करण्यात आले आहेत.

अंगणवाडी सेविकांचे मानधन वाढवण्याबाबत सकारात्मक

अंगणवाडी सेविका आणि मदतनीस यांचे मानधन वाढविण्याबाबत आणि पायाभूत सुविधांबाबत शासन सकारात्मक आहे. महिला शासकीय कर्मचाऱ्यांना १८० दिवसांची प्रसूती रजा मंजूर केली असून, प्रसूती रजेनंतर गरज भासल्यास कमाल एक वर्षापर्यंत वैद्यकीय प्रमाणपत्राशिवाय अर्धवेतनी रजा घेण्यासही परवानगी देण्यात आल्याचे त्यांनी सांगितले.