मुख्यमंत्री, दोन उपमुख्यमंत्र्यांचा दिमाखदार सोहळ्यात शपथविधी; ऐतिहासिक आझाद मैदानावर हजारो जनसमुदायाचा जल्लोष

महायुती सरकारच्या शपथविधीत ठरल्याप्रमाणे या तीन जणांनीच शपथ घेतली.

मुंबई : हजारो जनसमुदायाच्या उपस्थितीत व मावळत्या सूर्याला साक्षी ठेवत गुरुवारी मुंबईतील ऐतिहासिक आझाद मैदानावर महायुती सरकारचा शपथविधी सोहळा दिमाखदारपणे पार पडला. राज्यपाल सी. पी. राधाकृष्णन यांनी मुख्यमंत्री म्हणून देवेंद्र फडणवीस आणि उपमुख्यमंत्री म्हणून एकनाथ शिंदे व अजित पवार यांना पद आणि गोपनीयतेची शपथ दिली. महायुती सरकारच्या शपथविधीत ठरल्याप्रमाणे या तीन जणांनीच शपथ घेतली.

राज्याच्या मुख्य सचिव सुजाता सैनिक यांनी मुख्यमंत्रिपदाच्या शपथविधीसाठी देवेंद्र सरिता गंगाधरराव फडणवीस यांचे नाव पुकारताच आझाद मैदानावर उपस्थित जनसमुदायाने जल्लोष केला. फडणवीस शपथ सुरू करेपर्यंत टाळ्या व शिट्ट्यांनी मैदान दणाणून गेले. यावेळी ‘लाडक्या बहिणीचा लाडका भाऊ...देवाभाऊ देवाभाऊ’, अशा घोषणाही सुरू होत्या. त्यानंतर उपमुख्यमंत्री म्हणून शपथ घेण्यासाठी आधी एकनाथ शिंदे आणि नंतर अजित पवार यांचे नाव पुकारण्यात आले. यावेळीही जनसमुदायाने जल्लोष केला.

दाेघांच्या जॅकेटची चर्चा...

nया सोहळ्यासाठी अजित पवार यांनी आपले लकी गुलाबी जॅकेट घातले होते, तर देवेंद्र फडंणवीस यांनीही याच रंगाशी मिळत्या जुळत्या रंगाचे जॅकेट घातले होते.

nएकनाथ शिंदे आपल्या नेहमीच्या पांढऱ्या शर्ट आणि पँट या पेहरावात होते. फडणवीस यांना जॅकेटबाबत विचारले असता दादांनी शिवून दिले असे मिश्किल उत्तर त्यांनी दिले.

मविआच्या नेत्यांची पाठ

nया सोहळ्यासाठी मविआच्या नेत्यांना निमंत्रित करण्यात आले होते. देवेंद्र फडणवीस यांनी शरद पवार, उद्धव ठाकरे, राज ठाकरे, पृथ्वीराज चव्हाण, सुशीलकुमार शिंदे यांना फोन करून निमंत्रण दिले होते. मात्र मविआचा एकही नेता या सोहळ्याला आला नाही.

nया नेत्यांनी आपल्याला शुभेच्छा दिल्या, पण काही व्यक्तिगत कारणांनी ते येऊ शकले नाहीत, असे फडणवीस यांनी पत्रकार परिषदेत सांगितले.