काँग्रेसचे नेते राहुल गांधी यांची भारत जोडो न्याय यात्रा मुंबईत पोहोचली आहे. आज शिवाजी पार्कवर जाहीर सभा होणार आहे. या सभेत इंडिया आघाडीचे दिग्गज नेते उपस्थित राहणार आहेत. उद्धव ठाकरे, शरद पवार, मल्लिकार्जुन खर्गे, एम.के. स्टॅलिन आणि अखिलेश यादव, तेजस्वी यादव यांच्यासह इंडिया आघाडीचे अनेक ज्येष्ठ नेते सहभागी होऊन देशाला एकतेचा संदेश देणार आहेत. य़ाच दरम्यान भाजपाने निशाणा साधला आहे.
भाजपानेउद्धव ठाकरेंना खोचक टोला लगावला आहे. "शिवतीर्थावर "भारत जोडो न्याय सभेला" जाण्यापूर्वी उद्धव ठाकरे यांनी श्रीमान राहुल गांधी यांना घेऊन सावरकर स्मारकात जावे..." असं म्हटलं आहे. भाजपाचे नेते आशिष शेलार यांनी आपल्या ट्विटर अकाऊंटवरून याबाबत ट्विट केलं आहे. "श्रीमान उद्धव ठाकरे यांना आज हिंदुत्वाशी "न्याय" करण्याची एक उत्तम संधी आलीय..."
"शिवतीर्थावर "भारत जोडो न्याय सभेला" जाण्यापूर्वी उद्धव ठाकरे यांनी श्रीमान राहुल गांधी यांना घेऊन सावरकर स्मारकात जावे... स्वातंत्र्यवीर विनायक दामोदर सावरकर यांना अभिवादन करावे... स्मारकात ठेवण्यात आलेला "कोलू" ओढून राहुल गांधी यांना प्रायश्चित्त करण्याची एक संधी उपलब्ध करून द्यावी.. तुमचं हिंदुत्व, महाराष्ट्र प्रेम, मराठीपण सिद्ध करण्यासाठी आलेली संधी तुम्ही घालवलीत... तर आज महाराष्ट्र तुमच्या "भगव्या" शालीचा रंग बदला यावर शिक्कामोर्तब करेल!" असं आशिष शेलार यांनी आपल्या ट्विटमध्ये म्हटलं आहे.
"अरेच्चा उद्धवजी! हेच का तुमचं सावरकरप्रेम आणि बाळासाहेबांविषयीचा जाज्वल्य अभिमान?"
भाजपाच्या नेत्या चित्रा वाघ यांनी उद्धव ठाकरेंवर जोरदार हल्लाबोल केला आहे. आपल्या ट्विटर अकाऊंटवरून याबाबत ट्विट केलं आहे. "अरेच्चा उद्धवजी…! हेच का तुमचं सावरकरप्रेम आणि बाळासाहेबांविषयीचा जाज्वल्य अभिमान? तुमचं खोटं प्रेम आणि बेगडी अभिमान काँग्रेसचरणी लोटांगण घालताना साऱ्या मराठी जनतेने आज पाहिला…"
"राहुल गांधी सगळ्या ऐतिहासिक स्थळांना आणि महापुरूषांच्या पुतळ्यांना अभिवादन करत मुंबईभर फिरताहेत. पण, दोन स्थळांबद्दल मात्र त्यांना भलतीच ॲलर्जी... स्वातंत्र्यवीर सावरकर स्मारक आणि वंदनीय बाळासाहेबांच्या स्मृती जागवणारं शिवतीर्थ..! काँग्रेस वारंवार या महामानवांना अपमानित करूनही उबाठा गटाला लाचारी काही सोडवत नाही. काँग्रेसची मुजोरी आणि उबाठाची ‘जी हुजुरी’ हेच राहुल गांधींच्या पदयात्रेत पाहायला मिळतंय…" असं चित्रा वाघ यांनी आपल्या ट्विटमध्ये म्हटलं आहे.