उद्धव ठाकरे हे दोन दिवसीय विदर्भ दौऱ्यावर आले असता नागपुरात आयोजित सभेत त्यांनी उपमुख्यमंत्री देवेंद्र फडणवीस यांच्यावर जोरदार टीका केली होती. त्याचे पडसाद सर्वत्र उमटत असून भाजप कार्यकर्त्यांनी आक्रमक पवित्रा घेतला आहे. नागपुरात भाजप कार्यकर्त्यांकडून ठिकठिकाणी उद्धव ठाकरेंचा प्रतिकात्मक पुतळा जाळून निषेध नोंदवत आंदोलन करण्यात येत आहे. देवेंद्र फडणवीस हे नागपूरसाठी कलंक आहेत, अशी टीका उद्धव ठाकरे यांनी सोमवारी केली होती.
भाजपाचे नेते आशिष शेलार यांनी उद्धव ठाकरेंच्या या टीकेला जोरदार प्रत्युत्तर दिलं आहे. "जे "मी आणि माझं कुटुंब" एवढंच जगतात थोडक्यात काय तर जे मुंबईकरांना लुटतात तेच कलंक ठरतात!" असं म्हणत निशाणा साधला आहे. आशिष शेलार यांनी आपल्या ट्विटर अकाऊंटवरून याबाबत ट्विट केलं आहे. तसेच "जे नाल्यातील गाळ खातात, कोविडमध्ये सुध्दा भ्रष्टाचार करतात, गरिबांच्या पोरांच्या दप्तर, पाटी पेन्सिल मध्ये पण कट कमिशन खातात" असं म्हणत हल्लाबोल केला आहे.
"उद्धवजी, जे दुसऱ्यांसाठी जगतात ते कलंक कसे ठरतील?कलंक तर ते असतात ◆जे नाल्यातील गाळ खातात◆कोविडमध्ये सुध्दा भ्रष्टाचार करतात◆गरिबांच्या पोरांच्या दप्तर, पाटी पेन्सिल मध्ये पण कट कमिशन खातात◆जे रस्त्यावरचे डांबर खातात◆जे "मी आणि माझं कुटुंब" एवढंच जगतात थोडक्यात काय तर..◆जे मुंबईकरांना लुटतात तेच कलंक ठरतात!" असं आशिष शेलार यांनी आपल्या ट्विटमध्ये म्हटलं आहे.
"उद्धवजी, तुम्हीच कलंकित, हिंदुत्व गुंडाळून ठेवलं"
भाजपाने या टीकेला जोरदार प्रत्युत्तर देत उद्धव ठाकरेंवर बोचरी टीका केली आहे. "उद्धवजी, तुम्हीच कलंकित आहात. तुम्ही आमच्या पाठीत खंजीर खुपसला. हिंदुत्व गुंडाळून ठेवले. तुम्ही अहंकारी आहात. तुमच्याबद्दल शिल्लक असलेला आदरसुद्धा आता संपला आहे" असं म्हणत निशाणा साधला आहे. तसेच "उद्धव ठाकरे म्हणजे हिंदुत्वाला आणि महाराष्ट्राला लागलेला कलंक आहे" असंही म्हटलं आहे. भाजपाचे नेते चंद्रशेखर बावनकुळे यांनी उद्धव ठाकरेंवर टीकास्त्र सोडलं आहे. आपल्या ट्विटर अकाऊंटवरून याबाबत ट्विट केलं आहे.