“होय, ४ महिने NCP विलीनीकरण चर्चा, १२ तारखेला घोषणा होणार होती”; शरद पवारांचा मोठा गौप्यस्फोट

Sharad Pawar PC News: दोन्ही राष्ट्रवादी काँग्रेसच्या विलीनि‍करणाबाबत चर्चा सुरू होते. ती सकारात्मक होती, असे शरद पवार यांनी सांगितले.

Sharad Pawar PC News: नरेश अरोरा कोण आहेत, हे मला  माहिती नाही. सुनेत्रा पवार यांच्याशी काय चर्चा झाली हेही माहिती नाही. दोन्ही राष्ट्रवादी एकत्र येण्याबाबत गेले चार महिने चर्चा सुरू होती. या चर्चेचे नेतृत्व अजित पवार आणि जयंत पाटील हे करत होते. सगळ्या चर्चा या दोघांनी केल्या. परंतु, आता यामध्ये खंड पडलेला आहे, असे चित्र दिसत आहे. याबाबत १२ तारखेला घोषणा केली जाणार होती, असा मोठा गौप्यस्फोट राष्ट्रवादी काँग्रेस शरद पवार गटाचे प्रमुख शरद पवार यांनी केला. 

उपमुख्यमंत्री अजित पवार यांचे विमान अपघातात निधन झाल्यानंतर शरद पवारांनी पत्रकार परिषद घेतली. या पत्रकार परिषदेत बोलताना सुनेत्रा पवार यांची उपमुख्यमंत्री पदाची शपथ, दोन्ही राष्ट्रवादी काँग्रेसचे विलीनीकरण याबाबत सविस्तर भाष्य केले. अजित पवार पक्षाची जबाबदारी सांभाळत होते. ते गेले, आता कुणीतरी पुढे यायला हवे. त्यातून पक्षाने निर्णय घेतलेला दिसत आहे, असे शरद पवार यांनी सुनेत्रा पवार यांच्या निवडीवर बोलताना सांगितले. 

१२ तारखेला घोषणा होणार होती

एवढी घाई कशासाठी सुरू आहे, कोण करत आहे हे सगळे, असा प्रश्न पत्रकारांनी शरद पवार यांना विचारला. यावर मी नाही, मला एवढे माहिती आहे की, आमच्या पक्षाने आणि अजित पवार यांच्या पक्षाने एकत्र काम करण्याची प्रक्रिया सुरू करावी, यावर एकमत होते. १२ तारखेला याबाबत निर्णय जाहीर करायचा होता. पण दुर्दैवाने हा अपघात झाला. मला बाकी माहिती नाही. मला कोण सांगणार, अशी खंत शरद पवार यांनी व्यक्त केली. 

दरम्यान, दोन्ही राष्ट्रवादी काँग्रेस पक्षात सुसंवाद राहायला हवा, यासाठी चर्चा सुरू होती आणि ती सकारात्मक होती. दुर्दैवाने अजित पवार यांच्या अपघाती निधनामुळे यात खंड पडला. प्रफुल्ल पटेल, सुनील तटकरे यांनी त्यांच्या पक्षाबाबत निर्णय घेतले असतील. सुनेत्रा पवार यांच्या उपमुख्यमंत्रीपदाच्या शपथविधीबाबत मला माहिती नाही. मला कोणी सांगितले नाही, असा खुलासाही शरद पवारांनी केला.