दादा! अलविदा! उपमुख्यमंत्री अजित पवार यांची चटका लावणारी धक्कादायक एक्झिट, आज अंत्यसंस्कार

Ajit Pawar Death News: राज्याच्या राजकारणात अनेकदा धक्कातंत्राचा प्रत्यय देणारे उपमुख्यमंत्री अजित पवार (वय ६६) यांचे बुधवारी सकाळी विमान अपघातात निधन झाले. त्यांची ही अकाली एक्झिटही अवघ्या महाराष्ट्रासाठी धक्कादायक ठरली.

राज्याच्या राजकारणात अनेकदा धक्कातंत्राचा प्रत्यय देणारे उपमुख्यमंत्री अजित पवार (वय ६६) यांचे बुधवारी सकाळी विमान अपघातात निधन झाले. त्यांची ही अकाली एक्झिटही अवघ्या महाराष्ट्रासाठी धक्कादायक ठरली. वक्तशीर, बोलण्यात कडक पण तितकाच मिश्कील असलेला ‘दादा माणूस’ अचानक काळाच्या पडद्याआड गेल्याने संपूर्ण महाराष्ट्र हळहळला. बुधवारी सकाळी गोजुबावी (ता. बारामती) येथे त्यांचे विमान कोसळले. बारामती विमानतळावर लँडिंग दरम्यान सकाळी पावणे नऊच्या सुमारास हा अपघात झाला. यात उपमुख्यमंत्री पवार यांच्यासह पीएसओ विदिप जाधव, वैमानिक कॅप्टन सुमित कपूर, फर्स्ट ऑफिसर शांभवी पाठक, फ्लाइट अटेंडंट पिंकी माळी यांचाही मृत्यू झाला. बारामतीच्या इतिहासातील बुधवार हा ‘काळा दिवस’ ठरला.

जिल्हा परिषद निवडणुकीच्या प्रचार सभांसाठी उपमुख्यमंत्री पवार हे बारामतीत येणार होते. बुधवारी सकाळी मुंबई येथून सकाळी ८ वाजून १० मिनिटांनी ‘व्हीएसआर व्हेंचर्स’ कंपनीच्या ‘लिअरजेट ४५’ या विमानातून ते बारामतीकडे येत होते. आठ वाजून ५० मिनिटांनी त्यांची बारामती येथील लँडिंगची वेळ होती. मात्र, तत्पूर्वीच विमानतळावरील धावपट्टीच्या सुरुवातीलाच त्यांचे विमान अपघातग्रस्त झाले. विमान धावपट्टी सोडून बाजूला एका झाडावर जाऊन पडले. याच वेळी विमानाचा स्फोट झाला. यात संपूर्ण विमानाचे तुकडे झाले. 

सकाळी ११ वा. अंत्यसंस्कार उपमुख्यमंत्री अजित पवार यांच्या पार्थिवावर गुरुवारी (दि. २९) सकाळी ११ वाजता विद्या प्रतिष्ठानच्या मैदानावर अंत्यसंस्कार करण्यात येणार आहेत. तत्पूर्वी सकाळी ९ वाजता त्यांची अंत्ययात्रा निघणार आहे. 

पंतप्रधान उपस्थित राहणारअजित पवार यांच्यावर शासकीय इतमामात  अंत्यसंस्कार करण्यात येतील. यावेळी पंतप्रधान नरेंद्र मोदी, गृहमंत्री अमित शाह यांच्यासह देशभरातील अनेक प्रमुख नेते उपस्थित राहणार आहेत.   

राज्यात तीन दिवसांचा दुखवटा अजित पवार यांच्या निधनाबद्दल राज्य सरकारने बुधवारी संपूर्ण महाराष्ट्रात तीन दिवसांचा शासकीय दुखवटा जाहीर केला आहे. २८ ते ३० जानेवारी या कालावधीत शासकीय दुखवटा पाळण्यात येणार आहे. 

विमान वाहतुकीचे आजचे नियोजन हवाई दलाकडेअजित पवारांच्या अंत्यसंस्कारासाठी पंतप्रधानांसह देशभरातील अनेक प्रमुख नेते उपस्थित राहणार आहेत. त्यामुळे बारामती विमानतळावर मोठ्या संख्येने विमानांची ये-जा होणार आहे. परिस्थिती लक्षात घेऊन विमान वाहतुकीचे नियोजन करण्याची विनंती महाराष्ट्र सरकारने भारतीय हवाई दलाला केली आहे. 

लोकसभेत अजित पवार यांना श्रद्धांजलीलोकसभेने बुधवारी उपमुख्यमंत्री अजित पवार यांच्यासह बांगलादेशच्या माजी पंतप्रधान खालिदा झिया तसेच अलीकडेच निधन झालेल्या लोकसभेच्या पाच माजी सदस्यांना श्रद्धांजली वाहिली. माजी लोकसभा सदस्य असलेले अजित पवार यांचे बुधवारी विमान अपघातात निधन झाले, अशी माहिती लोकसभेत देण्यात आली.

बारामती येथे झालेल्या दुर्दैवी विमान दुर्घटनेने मी अत्यंत व्यथित झालो आहे. आपल्या प्रियजनांना गमावलेल्यांच्या दुःखात मी सहभागी आहे.-नरेंद्र मोदी, पंतप्रधान

उपमुख्यमंत्री अजित पवार हे तळागाळातील लोकांशी समर्पित आणि जोडलेले व्यक्तिमत्त्व होते. जनतेची सेवा करण्यासाठी नेहमीच तत्पर असलेले कष्टाळू, समर्पित नेते म्हणून त्यांचे नेहमीच स्मरण केले जाईल. - आचार्य देवव्रत, राज्यपाल, महाराष्ट्र

अजित पवार लोकनेते होते. त्यांच्याबद्दल जनसामान्यांमध्ये प्रचंड मोठी आस्था होती.  त्यांचं निघून जाणं हे अविश्वसनीय आहे. मनाला चटका लावणार आहे. दमदार आणि दिलदार मित्र मी गमावला आहे. - देवेंद्र फडणवीस, मुख्यमंत्री

अजितदादांचे निधन हे अत्यंत वेदनादायी, मनाला चटका लावणारे आहे. शिस्तबद्धता, स्पष्टवक्तेपणा आणि प्रशासनावर त्यांची पकड होती. या घटनेने अभ्यासू-मार्गदर्शक मोठा भाऊ गमावला आहे. - एकनाथ शिंदे, उपमुख्यमंत्री

घड्याळानेच पटली मृतदेहाची ओळखसर्व मृतदेह अत्यंत जळालेल्या अवस्थेत आढळून आले. अजित पवार यांच्या मृतदेहाची ओळख त्यांच्या मनगटावरील घड्याळामुळे पटली. ‘घड्याळ’ हेच चिन्ह घेऊन अजित पवारांचा संपूर्ण राजकीय प्रवास झाला आणि त्याच घड्याळाने त्यांच्या मृतदेहाची ओळख पटवणे, हा नियतीचा क्रूर खेळ असल्याची भावना अनेकांनी व्यक्त केली. 

पायलटची चूक होती की तांत्रिक बिघाड?अजित पवार यांना घेऊन जाणाऱ्या विमानाचा अपघात नेमका कशामुळे झाला? या घटनेमागे तांत्रिक बिघाड होता की मानवी चूक, याबाबत आता तर्क-वितर्क लढवले जात आहेत. 'बंबार्डिअर लिअरजेट ४५ एक्सआर' या ८ सीटर विमानाला लँडिंगदरम्यान हा अपघात झाला. विमान लँड करताना पायलटला दिसणाऱ्या धावपट्टीचा अंदाज घेऊनच विमान उतरवावे लागते. बाहेरून त्यांना मदत देणे शक्य होत नाही. त्यामुळे ही पायलटची चूक होती की, ऐनवेळी तांत्रिक बिघाड झाला, याचा तपास सध्या सुरू आहे.

काय आहेत शक्यता?तज्ज्ञांच्या मते, विमान उतरवताना वैमानिकाला प्रामुख्याने 'व्हिज्युअल ॲप्रोच' घ्यावा लागतो. म्हणजेच, रनवे डोळ्यांनी स्पष्ट पाहूनच विमान जमिनीवर उतरवावे लागते. या ठिकाणी विमान लँडिंगसाठी इतर अत्याधुनिक तांत्रिक प्रणालींची मदत मर्यादित असते. त्यामुळे धावपट्टीचा अंदाज घेण्यात वैमानिकाची चूक झाली असावी किंवा ऐनवेळी काही तांत्रिक अडचण उद्भवली असावी.