Tips: कामाच्या ठिकाणी होणारे मतभेद मिटवण्यासाठी ६ सोप्या टिप्स!

ऑफिसमध्ये वाद होणे अगदी नैसर्गिक आहे. वेगवेगळ्या स्वभावांचे लोक, कामाचा ताण, डेडलाइन्स… आणि कधी तरी मतभेद होतातच. पण वाद झाला म्हणून नाते खराब व्हायलाच हवे असे नाही. वाद कसा हाताळला जातो, यावर तुमची प्रतिमा आणि प्रोफेशनल इमेज ठरते.  चला पाहूया  ऑफिसमधले वाद शांतपणे हाताळण्यासाठीचे हे ६ सोपे उपाय…

योग्य वेळ निवडा:
वाद झाला की लगेच प्रतिक्रिया देऊ नका, कारण रागात बोललेले बहुतेक वेळेस परिस्थिती अधिक बिघडवते; थोडे शांत झाल्यावर संवाद परिणामकारक होतो. उपाय काय? योग्य वेळ निवडा. समस्या ताजी असताना बोला, पण रागात नाही. सामोपचारातून मार्ग निघतो. 

आधी थांबा, मग पाऊल टाका:
कधी कधी आपण परिस्थिती अर्धवट माहितीवरून समजतो आणि चुकीचा निष्कर्ष काढतो; थोडे मागे जाऊन पाहिले तर गोष्टींची खरी बाजू दिसते. उपाय काय? स्वतःला विचारा, “मी इथे काय चुकत आहे?” मगच पुढील पाऊल उचला.

भावना नव्हे, तथ्य महत्त्वाचे:
वाद वाढण्याचे मूळ कारण भावनिक प्रतिक्रिया असते, पण निर्णय आणि संवाद तर्कावर आधारलेले असतील तर वाद निम्मा कमी होतो. उपाय काय? बोलण्यापूर्वी पुरावे, नोंदी, मेल्स तयार ठेवा आणि चर्चा तथ्यांवर आधारित ठेवा.

‘आपले’ म्हणा, ‘माझे’ नाही: 
‘तू चुकलास’ म्हणालो की समोरचा लगेच बचावात जातो, पण समस्या ‘आपली’ आहे असे म्हटले की नाते आणि संवाद दोन्ही सुधारतात. उपाय काय? समस्या टीमची आहे असे मांडून सामायिक ध्येय स्पष्ट करा. त्यातून समस्या चुटकीसरशी सुटू शकते. 

भावना समजा, पण त्यांचे गुलाम होऊ नका:
समोरचा रागावलेला किंवा दुखावलेला असेल, पण भावनेत अडकलो तर चर्चेचे रूप भांडणात बदलते; शांतता हीच शक्ती आहे. उपाय काय? भावना मान्य करा, पण निर्णय व्यावसायिकपणे घ्या. समोरचा रागात असला तरी तुम्ही प्रोफेशनल राहा.

तक्रार नव्हे, उपाय घ्या: 
वारंवार दोष काढत बसलात तर वाद वाढतो, पण समस्या सोडवणारा दृष्टिकोन कोणत्याही मतभेदाला संवादात बदलतो. उपाय काय? ‘हे चुकलं’ ऐवजी ‘आता पुढचं पाऊल काय?’ असा प्रश्न विचारा.