राजकुमार जाेंधळे, हाळी-हंडरगुळी (जि. लातूर): उदगीर तालुक्यातील हाळी-रुद्रवाडी रस्त्यावर दुचाकीवरून घसरून पडलेल्या महिलेला बसने चिरडल्याची घटना शुक्रवारी सायंकाळच्या सुमारास घडली. यामध्ये महिला जागीच ठार झाली आहे. उज्ज्वलाबाई हरिश्चंद्र भुरकापल्ले (वय ४५, रा. येणगेवाडी) असे मयत महिलेचे नाव आहे.
पाेलिसांनी सांगितले, महाराष्ट्र राज्य मार्ग परिवहन महामंडळाची बस (एम.एच. ४० एन ९१८६) शुक्रवारी सायंकाळी साडेसहा वाजण्याच्या सुमारास चाकूर येथून बोरगाव मार्गे हाळी-हंडरगुळी गावाकडे येत होती. दरम्यान, हाळी येथून येणगेवाडीकडे दुचाकीवरून उज्ज्वलाबाई या एका नातेवाइकासाेबत जात हाेत्या. दरम्यान, हाळी हंडरगुळी गावानजीक मोरतळे यांच्या ढाब्यासमोरील वळण रस्त्यावर पाऊस पडल्याने अचानक दुचाकी घसरली.
यावेळी दुचाकीवर पाठीमागे बसलेली महिला रस्त्यावर पडली अन् समोरून येणाऱ्या बसखाली आली. यावेळी बसच्या चाकाखाली ही महिला चिरडली गेली. यामध्ये महिलेचा जागीच मृत्यू झाला. घटनेची माहिती मिळताच पोलिस कर्मचारी संजय दळवी, कसबे यांनी घटनास्थळी भेट देऊन पंचनामा केला. याबाबत वाढवणा पाेलिस ठाण्यात गुन्हा नोंद करण्याची प्रक्रिया रात्री उशिरापर्यंत सुरू होती.