पैशासाठी मित्राचा कुऱ्हाडीने घाव घालून खून; आरोपीला जन्मठेप

लातूर येथील जिल्हा व सत्र न्यायालयाचा निकाल

राजकुमार जाेंधळे / लातूर : पैशासाठी मित्राचा डाेक्यात कुऱ्हाडीने घाव घालून खून करणाऱ्या आराेपी साेमनाथ राजेंद्र सगर याला जन्मठेप व पाच हजारांचा दंड, अशी शिक्षा लातूर येथील प्रमुख जिल्हा व सत्र न्यायालयाचे न्यायाधीश व्ही. व्ही. पाटील यांनी बुधवारी सुनावली.

सहायक सरकारी वकील व्ही. व्ही. देशपांडे यांनी सांगितले, आराेपी साेमनाथ राजेंद्र सगर (रा. हरंगुळ बु., ता. जि. लातूर) याने मित्र श्रीकांत ऊर्फ बबलू आत्मलिंग चिल्लरगे (रा. तत्तापूर, ता. रेणापूर) याच्याकडील काेथिंबीर विक्री करून आणलेली रक्कम बळकावण्याच्या उद्देशाने त्याच्या डाेक्यात, मानेनजीक कुऱ्हाडीने घाव घालून खून केला. ही घटना २९ सप्टेंबर २०२० राेजी रात्री घडली. याबाबत गांधी चाैक ठाण्यात ओम चिल्लरगे याच्या फिर्यादीवरून गुन्हा दाखल केला.

मयत श्रीकांत ऊर्फ बबलू चिल्लरगे याने नागपूर येथे काेथिंबीर विक्रीसाठी पिकअप वाहन घेऊन गेला हाेता. काेथिंबीर विक्री करून त्या काेथिंबिरीची पट्टी आणि रक्कम घेऊन लातूर येथे आला. लातूर येथे आराेपी, मयत आणि इतर साक्षीदारांनी सिद्धेश्वर मंदिराच्या बाजूला एका पाण्याच्या प्लांटच्या बाजूच्या खाेलीत २९ सप्टेंबर २०२० राेजी रात्री पार्टी केली. त्या खाेलीमध्ये मयत श्रीकांत आणि आराेपी साेमनाथ सगर झाेपले हाेते. पैसे बळकावण्याच्या उद्देशाने आराेपी साेमनाथ सगर याने श्रीकांत चिल्लरगे याच्यावर कुऱ्हाडीचे घाव घालत गंभीर जखमी केले. यात त्याचा मृत्यू झाला. त्यानंतर साेमनाथजवळ असलेले पैसे घेऊन ताे पुणे येथे पळून गेला. पुणे येथे समाधान लाॅजवर मुक्कामाला हाेता.

दरम्यान, आराेपी साेमनाथ हा पुणे येथे असल्याची माहिती पाेलिसांना मिळाली. या माहितीच्या आधारे लातूर पाेलिसांनी पुण्यातील समाधान लाॅजवरून आराेपीला अटक केली. त्याच्यासाेबत असलेल्या पिशवीत नागपूर येथे विक्री केलेल्या काेथिंबीरची पट्टी व राेकड आढळून आली. यात लाॅज व्यवस्थापक, ज्या खासगी वाहनाने आराेपी पुणे येथे गेला ताे वाहन चालक, डाॅक्टरांचे जबाब नाेंदविले. इतर साक्षीदारांची साक्षही महत्त्वपूर्ण ठरली. दाेषी आराेपी साेमनाथ सगर याला जन्मठेप, पाच हजारांच्या दंडाची शिक्षा सुनावली.