अपहरणाचे नाट्य आणि काँग्रेसला झटका! पोलीस बंदोबस्तात उमेदवार अंजना चौधरींची निवडणुकीतून माघार

लातूर जिल्हा परिषदेच्या तांबाळा गटातून उमेदवारी अर्ज दाखल करणाऱ्या अंजना चौधरी यांनी माघार घेतली आहे. त्यांचे अपहरण झाले असल्याची तक्रार पोलीस ठाण्यात देण्यात आली होती.

निलंगा (जि. लातूर) : जिल्ह्यातील निलंगा तालुक्यातील तांबाळा जिल्हा परिषद गटाचे काँग्रेस उमेदवार अंजना सुनील चौधरी यांचे अपहरण झाल्याची तक्रार २५ जानेवारी रोजी काँग्रेस जिल्हाध्यक्षांनी पोलिसांत केली होती. दरम्यान, उमेदवारी अर्ज माघारी घेण्याच्या शेवटच्या दिवशी मंगळवारी अंजना चौधरी यांनी पोलिस बंदोबस्तात हजर राहत उमेदवारी अर्ज मागे घेतल्याने काँग्रेस गोटात खळबळ उडाली.

काँग्रेसने उमेदवारी दिलेल्या अंजना सुनील चौधरी यांचे अपहरण झाल्याची तक्रार काँग्रेसचे जिल्हाध्यक्ष अभय साळुंके, ॲड. किरण जाधव यांनी जिल्हा पोलिस अधीक्षकांकडे २५ जानेवारी रोजी केली होती. उमेदवारास शोधून समोर हजर करावे, अशी त्यांची मागणी होती. 

परंतु, अर्ज माघारी घेण्याच्या दिवशी म्हणजे २७ जानेवारी रोजी सकाळी ११:३० वाजेच्या सुमारास उमेदवार अंजना चौधरी पोलीस बंदोबस्तात निलंगा येथील निवडणूक अधिकाऱ्यांच्या कार्यालयात दाखल झाल्या. यावेळी त्यांनी अर्ज परत घेतला.

भाजप विरुद्ध भाजप?

तांबाळा गटातून भाजपने महानंदा तुमकुटे यांना उमेदवारी दिली. तर भाजपकडूनच मीरा तुबाकले यांचाही अर्ज दाखल करण्यात आला होता. परंतु, नाट्यमयरीत्या काँग्रेस उमेदवाराने अचानक माघार घेतली असली तरी तुबाकले यांनी अर्ज मागे घेतला नाही. त्यामुळे तांबाळा गटाच्या मैदानात भाजप अधिकृत उमेदवार विरुद्ध भाजपकडूनच पर्यायी अर्ज दाखल केलेला उमेदवार अशी लढाई होणार आहे. 

पर्यायी उमेदवाराचा अर्ज मागे घेतला जाईल, अशी शक्यता होती; परंतु तो अर्ज कायम राहिल्याने बिनविरोध निघण्याचा भाजपचा इरादा फसला आहे. आता भाजपचाच असलेला पर्यायी उमेदवार अधिकृत उमेदवाराच्या विरोधात लढाईत उतरतो की तलवार म्यान करतो, हे प्रचारादरम्यान कळणार आहे. 

किंबहुना काँग्रेसकडून भाजप पर्यायी उमेदवाराला पाठबळ देऊन लढाईत रंगत आणली जाईल का, अशीही चर्चा सुरू आहे.

काँग्रेसला उमेदवार मिळाला नाही

अंजना सुनील चौधरी या भाजपच्याच आहेत. याउलट काँग्रेसला तांबाळा गटात उमेदवारच मिळत नव्हता. त्यामुळे त्यांनी अंजना चौधरी यांच्या अर्जाला दुपारी २:४७ वाजता शेवटच्या क्षणी एबी फॉर्म जोडला होता. मात्र, चौधरी यांची घरवापसी झाली असून, त्या आता भाजपासोबत प्रचारामध्ये आहेत.- अरविंद निलंगेकर, भाजप

भाजपचा बिनविरोधचा डाव फसला

सत्तेचा गैरवापर करून तांबाळा गटातील उमेदवारी माघारी घेतली गेली असली तरी बिनविरोधचा डाव फसला आहे. भाजप अधिकृत उमेदवाराला भाजपनेच उभा केलेला दुसरा उमेदवार आव्हान देणार आहे. आता त्या पर्यायी उमेदवाराला पाठबळ द्यायचे का? हा निर्णय वरिष्ठांसोबत चर्चा करून देऊ. -अभय साळुंके, जिल्हाध्यक्ष, काँग्रेस