उदगीर तालुक्याचे खरिपाचे एकूण ६६ हजार हेक्टर क्षेत्र आहे. गेल्यावर्षी ४२ हजार हेक्टरवर सोयाबीनची पेरणी झाली होती. उर्वरित २४ हजार हेक्टरवर तुरी सह अन्य खरीपाची पिके होती. यंदा सोयाबीनला आत्तापर्यंतचा विक्रमी भाव बाजारात मिळाल्याने तालुक्यातील शेतकऱ्यांचा कल सोयाबीनची पीक घेण्याकडे दिसून येत आहे. बाजारात महाबीज कंपनीचे बियाणे मात्र गायब झाल्याचे दिसून येत आहे. अनुदानित बियाणांसाठी ऑनलाइन पद्धतीने नाव नोंदणी केलेल्या शेतकऱ्यांना तालुका कृषी विभागाकडून परमिट दिले जात असले, तरी प्रत्यक्षात दुकानदाराकडे बियाणे नसल्याचा अनुभव मागील दोन दिवसांपासून शेतकऱ्यांना येत आहे. बियाणे टंचाई असल्याने शेतकऱ्यांना आता खासगी कंपन्यांच्या बियाण्याशिवाय पर्याय उरलेला नाही. महाबीज आणि खासगी कंपन्यांच्या बियाण्याच्या दरात साधारणत: हजार ते दीड हजार रुपयांपर्यंत फरक आहे. शेतकरी मशागतीची कामे, बी-बियाणे व खतांची खरेदी करण्यात व्यस्त आहे. शेतकऱ्यांची सर्वाधिक पसंती असलेल्या डीएपी खताचा बाजारात तुटवडा मोठ्या प्रमाणात आढळून येत आहे. परिणामी, शेतकऱ्यांना गैरसोयीचा सामना करावा लागत आहे.
तालुका कृषी विभागाचा प्रतिसाद नाही...
बियाणे व खते पुरवठ्यावर नियंत्रण करणारी कृषी यंत्रणा मात्र या काळात कुठेही प्रत्यक्षात पुढे आलेली नाही. तालुका कृषी अधिकारी कार्यालयात कुणीही जबाबदार अधिकारी याबाबत बोलत नाही. तालुका कृषी अधिकारी कार्यालयाशी संपर्क होत नसल्याचे चित्र आहे.
टोकण देऊनही होतेय गैरसोय...
तालुका कृषी विभागाच्या कार्यालयातून अनुदानित सोयाबीनचे २२८ बियाण्यांच्या वाणाचे परमिट देण्यात आले. यासाठी कार्यालयाने सांगितलेल्या दुकानात गेले असता त्यांनी टोकन घेऊन येण्याचे सांगितले. मागील दोन दिवसांपासून टोकन घेऊन मी दुकानदाराकडे चकरा मारत आहे. परंतु सदरील दुकानदार बियाणे देण्यास तयार नाही.- माधव विरकपाळे, शेतकरी, मोघा.
.
===Photopath===
090621\img-20210609-wa0004.jpg
===Caption===
शेतकऱ्यांची सोयाबीन बियाणेसाठी धावपळ !महाबीजच्या बियाण्याला सर्वाधीक मागणी !