Latest Marathi News

ठाणे : ठाणे महापालिकेच्या सातव्या सार्वत्रिक निवडणुकीत शिवसेनेला २५ वर्षांच्या सत्ताकाळात प्रथमच स्पष्ट बहुमत मिळाले आहे. या निवडणुकीत मित्रपक्ष भाजपानेच शिवसेनेला आव्हान देत स्वबळावर लढण्याचा निर्णय घेतल्याने शिवसेनेच्या यशापयशाबाबत शंका व्यक्त केल्या जात असताना तब्बल ६७ जागांवर विजय मिळवत शिवसेनेने ठाण्यात स्वबळावर सत्ता स्थापन करण्याचा मार्ग मोकळा केला आहे.मागील निवडणुकीच्या तुलनेत शिवसेनेच्या जागांमध्ये १५ जागांची भर पडली आहे. तर मागील वेळी केवळ आठ जागा मिळवणाऱ्या भाजपाला २३ जागा मिळाल्याने या पक्षालाही १५ जागांचा लाभ झाला आहे. राष्ट्रवादी काँग्रेसने ३४ जागांवर विजय मिळवत आपले पूर्वीचे संख्याबळ टिकवून ठेवले. काँग्रेस ३ तर एमआयएमने मुंब्य्रात करिष्मा दाखवत दोन जागांवर विजय मिळवला आहे. दोन जागांवर अपक्ष निवडून आले आहेत. या निवडणुकीत अनेक दिग्गजांना पराभवाची धूळ चाखावी लागली.ठाणे महापालिकेच्या सातव्या सार्वत्रिक निवडणुकीत ३३ प्रभागांतील १३१ जागांसाठी झालेल्या मतदानात १२ लाख २८ हजार ६०६ मतदारांपैकी ७ लाख २४ हजार ९०३ मतदारांनी आपला मतदानाचा हक्क बजावला आहे. यामध्ये ६ लाख ६७ हजार ५०४ पुरुष मतदारांपैकी ३ लाख ९५ हजार ९३९ मतदारांनी मतदानाचा हक्क बजावला आहे, तर ५ लाख ६१ हजार ८७ महिला मतदारांपैकी ३ लाख २८ हजार ९६२ महिलांनी मतदानाचा हक्क बजावला. ३३ प्रभागांमध्ये सर्वच ठिकाणी मतदानाचा टक्का मागील निवडणुकीच्या तुलनेत वाढलेला दिसून आला. दरम्यान, २००७ मध्ये झालेल्या निवडणुकीत ५६.५७ टक्के आणि २०१२ मध्ये झालेल्या निवडणुकीत ५३.२५ टक्के मतदानाची नोंद झाली होती. यापूर्वीच्या अनुभवानुसार मतदानाचा टक्का कमी असेल, तर त्याचा फायदा शिवसेनेला झालेला दिसून आला. २००७ आणि २०१२ मध्ये शिवसेनेला बहुमत मिळाले होते. २०१२ मध्ये द्विपॅनल पद्धत होती. परंतु, स्पष्ट बहुमतासाठी शिवसेनेला तारेवरची कसरत करावी लागली होती. यंदा मात्र मतदानाचा टक्का वाढल्याने त्याचा फायदा भाजपाला होईल, अशी शक्यता होती. तसे झालेही. भाजपाच्या वाट्याला ८ वरून २३ जागा आल्या, तर शिवसेनेच्या जागांमध्ये ५३ वरून ६८ अशी वाढ झाली.धक्कादायक पराभवनौपाड्यातील सहा वेळा सलग निवडून येणारे विलास सामंत, हिराकांत फर्डे, सुजाता पाटील, अनिता बिर्जे, शिवसेनेचे कल्याण ग्रामीणचे आमदार सुभाष भोईर यांचा मुलगा सुमित भोईर, ठाण्याचे खासदार राजन विचारे यांचा पुतण्या ठाणे महापालिकेतील विद्यमान नगरसेवक मंदार विचारे, शिवसेना उपनेते माजी आमदार अनंत तरे याचा भाऊ संजय तरे, त्यांची पत्नी विद्यमान नगरसेविका महेश्वरी तरे, माजी महापौर स्वत: हरिश्चंद्र पाटील, त्यांची सून स्नेहा पाटील, शिवसेनेच्या ठाणे जिल्हा संघटक अनिता बिर्जे, सुधीर भगत, गिरीश राजे, रेश्मा पाटील, उज्ज्वला फडतरे, बालाजी काकडे, राधा फतेबहादूर सिंग, संजय सोनार, रिपाइंचे ठाणे शहराध्यक्ष रामभाऊ तायडे, भाजपाचे संजय घाडीगावकर यांची पत्नी स्वाती घाडीगावकर, स्वाती देशमुख आणि राष्ट्रवादीच्या मनीषा साळवी यांचा समावेश आहे.दुसरीकडे काँग्रेसचे शहराध्यक्ष मनोज शिंदे हे सलग सहा टर्म निवडून येणारे होते. परंतु, या निवडणुकीत त्यांच्यासह त्यांचे बंधू शैलेश शिंदे यांचा पराभव झाला. परमार प्रकरणात ज्यांचे नाव होते, असे सुधाकर चव्हाण, त्यांची पुतणी तेजस्विनी चव्हाण यांनाही पराभवाचे तोंड पाहावे लागले.या घराण्यांना बसला धक्काठाणे महापालिका निवडणुकीत शिवसेनेचे खासदार राजन विचारे, एच.एस. पाटील आणि आमदार सुभाष भोईर या घराण्यांना धक्का बसला आहे.एच.एस. पाटील यांच्यासह त्यांच्या सुनेचा पराभव झाला असून पत्नी कल्पना पाटील विजयी झाल्या. खासदार राजन विचारे यांना मात्र जबरदस्त धक्का बसला असून त्यांचा पुतण्या मंदार विचारे याचा पराभव झाला आहे.ही घराणेशाही टिकलीमात्र, त्याच वेळी पालकमंत्री एकनाथ शिंदे यांचे बंधू प्रकाश आणि आमदार प्रताप सरनाईक यांची पत्नी परिषा सरनाईक, पुत्र पूर्वेश सरनाईक आणि पीए संदीप डोंगरे व त्यांची पत्नी आशा डोंगरे हे सारे विजयी झाल्याने शिंदे-सरनाईक यांच्या घराणेशाहीला मतदारांनी स्वीकारले.

‘कभी खुशी कभी गम’ या सिनेमाला भारतीय चित्रपटसृष्टीत एक विशेष स्थान आहे. या सिनेमातील चिमुकला बालकलाकार आठवतो? ...

बारामती तालुक्यातील आरोग्य यंत्रणा काही विशिष्ट व्यक्तींच्या हाती असल्याचा गंभीर आरोप ...

सागर कारंडेनं ही पोस्टमन काकाची भूमिका अगदी चोख बजावली आहे. ...

...