कोल्हापूर : अल्पवयीन मुलीवर अत्याचार करणाऱ्या राजेंद्रनगर झोपडपट्टीतील तरुणाला न्यायालयाने दोषी ठरवले. कुमार महादू गायकवाड (वय ३०, रा. नवीन वसाहत, राजेंद्रनगर झोपडपट्टी, कोल्हापूर) याला न्यायालयाने पाच वर्षे सक्तमजुरी व पाच हजार रुपये दंडाची शिक्षा सुनावली. ही शिक्षा जिल्हा व सत्र न्यायाधीश (वर्ग १) एस. आर. पाटील यांनी ठोठावली. सरकारतर्फे ॲड. प्रतिभा जाधव यांनी काम पाहिले.
या खटल्याची थोडक्यात पार्श्वभूमी अशी की, शहर परिसरातील एक सात वर्षीय मुलगी १२ जून २०१३ रोजी दुपारी रिक्षात खेळत होती. यावेळी तिच्या अज्ञानाचा फायदा घेऊन कुमार गायकवाडने तिच्यावर अत्याचार केला. पीडितेच्या आईने याबाबत राजारामपुरी पोलीस ठाण्यात तक्रार दिली होती, त्यानुसार गायकवाड याच्यावर बालकांच्या लैंगिक अत्याचारापासून सरंक्षण कायद्यांतर्गत गुन्हा दाखल झाला होता. याचा तपास पोलीस उपनिरीक्षक ए. बी. लांडगे यांनी केला.
या खटल्यात सहा साक्षीदार तपासण्यात आले. सरकार पक्षातर्फे सरकारी अभियोक्ता ॲड. जाधव यांनी बाजू मांडली. यातील फिर्यादी व प्रत्यक्षदर्शी साक्षीदारांच्या साक्षी महत्त्वाच्या ठरल्या. न्यायालयाने दोन्ही बाजूंच्या युक्तीवादानंतर कुमार गायकवाडला दोषी ठरवत शिक्षा सुनावली. यासाठी सरकार पक्षाला राजारामपुरी पोलीस ठाण्याचे पैरवी अधिकारी अशोक शिंगे, सहाय्यक फौजदार एम. एम. नाईक यांचे सहकार्य मिळाले.
फोटो नं. २००२२०२१-कोल-कुमार गायकवाड (आरोपी)