पतीचा शवविच्छेदनाचा अहवाल न मिळाल्याने पत्नीचा उपोषणाचा इशारा

: वारंवार मागणी करूनही गेल्या एक वर्षापासून मृत पतीच्या शवविच्छेदनाचा अहवाल देण्यास मलकापूर ग्रामीण रुग्णालयाच्या प्रशासनाने तसेच पोलीस प्रशासनाने टाळाटाळ केल्याने गोगवे (ता. शाहूवाडी) येथील रूपाली रंगराव गुरव यांनी शाहूवाडी तहसील कार्यालयासमोर आमरण उपोषण करण्याचा इशारा दिला आहे.

रूपाली यांचे पती रंगराव सदाशिव गुरव यांचा ३० एप्रिल २०२० रोजी शेतामध्ये काम करत असताना त्यांचा आकस्मिक मृत्यू झाला होता. यावेळी मलकापूर ग्रामीण रुग्णालयात त्यांच्या मृतदेहाचे शवविच्छेदन करण्यात आले. शवविच्छेदनाच्या अहवालात मृत्यूचे नेमके कारण समजू न शकल्याने त्यांचा व्हिसेरा पुढील तपासणीसाठी पाठविण्यात आला होता. दरम्यान रंगराव गुरव यांच्या विमा पॉलिसीसह इतर शासकीय कामासाठी रूपाली गुरव यांना शवविच्छेदनाच्या अहवालाची आवश्यकता असल्याने त्यांनी या अहवालाची मागणी शाहूवाडी पोलीस ठाणे तसेच मलकापूर ग्रामीण रुग्णालयाच्या प्रशासनाकडे केली. परंतु दोन्हीकडील प्रशासनाने हा अहवाल देण्यास टाळाटाळ केल्याने त्यांना अद्यापही हा अहवाल मिळू शकलेला नाही. त्यामुळे येत्या पंधरा दिवसात हा अहवाल न मिळाल्यास आपल्या कुटुंबीयांसमवेत २२ एप्रिलपासून शाहूवाडी तहसील कार्यालयासमोर आमरण उपोषण करण्याचा इशारा रूपाली गुरव यांनी दिला आहे.