गणवेशाबाबत शिक्षकांकडून अल्प प्रतिसाद

कोल्हापूर : जिल्हा परिषदेच्या शिक्षकांसाठी गणवेश ठरवून दिल्यानंतरही त्याची अंमलबजावणी होत नसल्याने शिक्षण सभापती प्रवीण यादव आणि प्राथमिक शिक्षणाधिकारी आशा उबाळे सोमवारपासून जिल्ह्याच्या दौऱ्यावर जाणार आहेत. जिल्ह्यातून गणवेशाबाबत अल्प प्रतिसाद मिळत असून मोजक्या शाळांमध्ये शिक्षकांनी या आदेशाची अंमलबजावणी केल्याचे दिसून येत आहे.

जिल्हा परिषदेच्या शिक्षकांना सोमवारी आणि मंगळवारी पिस्ता रंगाचा शर्ट आणि काळी पॅन्ट तर गुरुवारी, शुक्रवारी गुलाबी रंगाचा शर्ट व काळी पॅन्ट असा गणवेश ठरवून दिला आहे. बुधवार आणि शनिवार हे दोन दिवस कोणत्याही योग्य पोशाखास परवानगी देण्यात आली आहेत. महिला शिक्षकांसाठी करड्या रंगाचे हाफ जॉकेट बंधनकारक करण्यात आले आहे. मात्र, काही शिक्षक संघटनांनी या गणवेशांना विरोध केला आहे.

१ एप्रिलपासून सर्व शिक्षक, शिक्षिकांसाठी हा गणवेश बंधनकारक करण्यात आला. याच दिवशी शिक्षणाधिकारी आशा उबाळे यांनी बाराही तालुक्यांतून किती शाळांमध्ये गणवेश वापरला आहे, याचे फोटो मागवले होते. मात्र, त्याला फारसा प्रतिसाद मिळालेला नाही. काही मोजक्या शाळांमधील शिक्षकांनी या आदेशाची अंमलबजावणी केली आहे. या पार्श्वभूमीवर शिक्षण सभापती प्रवीण यादव आणि आशा उबाळे हे वेगवेगळ्या तालुक्यांमध्ये फिरतीसाठी जाणार आहेत.

०३०४२०२१ कोल झेडपी ०१

कागल तालुक्यातील गोरंबे येथील प्राथमिक शाळेच्या शिक्षकांनी गणवेश परिधान करून सूचनांचे पालन केले.