संग्राम कुपेकर अखेर शिवसेनेत

उद्धव ठाकरे यांच्या उपस्थित प्रवेश : वर्षभरातील विविध पर्यायांच्या चाचपणीनंतर निर्णय

  कोल्हापूर : जिल्हा परिषदेचे माजी बांधकाम सभापती संग्राम कुपेकर यांनी बुधवारी शिवसेनेत प्रवेश केला. पक्षप्रमुख उद्धव ठाकरे यांच्या उपस्थितीत शिवसेना भवन येथे शेकडो कार्यकर्त्यांसह त्यांनी हातात शिवबंधन बांधले. विधानसभा निवडणुकीत त्यांनी राष्ट्रवादी काँग्रेस विरोधात बंडखोरी करत जनसुराज्य शक्ती पक्षातर्फे चंदगडमधून निवडणूक लढविली होती. स्वर्गीय बाबासाहेब कुपेकर यांच्या हाताला धरून राजकारणात प्रवेश केलेले संग्राम कुपेकर यांनी अल्पावधीत आपल्या नेतृत्व गुणांची चुणूक गडहिंग्लज तालुक्यात दाखविली. गडहिंग्लज पंचायत समितीचे उपसभापती म्हणून त्यांनी आक्रमकपणे काम केले. त्यानंतर जिल्हा परिषदेचे बांधकाम व आरोग्य सभापती म्हणूनही त्यांनी आपल्या कामाचा ठसा उमटवला. बाबासाहेब कुपेकर यांच्या निधनानंतर झालेल्या पोटनिवडणुकीत त्यांनी तयारी केली होती; पण राष्ट्रवादी काँग्रेसने संध्यादेवी कुपेकर यांना उमेदवारी दिली. त्यानंतर झालेल्या २०१४ च्या विधानसभा निवडणुकीत संग्राम कुपेकर यांनी उमेदवारीसाठी शर्तीचे प्रयत्न केले होते; पण राष्ट्रवादी काँग्रेस व कुपेकर घराण्यातील अंतर्गत राजकारणातून त्यांना डावलण्यात आले. त्यामुळे त्यांनी ऐनवेळी जनसुराज्य पक्षाचा नारळ हातात घेऊन विधानसभेची निवडणूक लढस्रवली. त्यानंतर गेले वर्षभर ते विविध पर्यायांची चाचपणी करत होते, अखेर बुधवारी त्यांनी शिवसेनेत प्रवेश केला. मुंबई येथील सेना भवन येथे पक्षप्रमुख उद्धव ठाकरे यांच्या उपस्थित शेकडो कार्यकर्त्यांसह शिवसेनेत प्रवेश केला. यावेळी खासदार अनिल देसाई, कोल्हापूरचे संपर्कप्रमुख अरुण दुधवाडकर, आमदार सुनील शिंदे, जिल्हाप्रमुख संजय पवार, मुरलीधर जाधव, भैयासाहेब कुपेकर, बाळासाहेब कुपेकर, शिवाजीराव हिडदुग्गी, कृष्णराव वार्इंगडे, शेखर गावडे यांच्यासह चंदगड विधानसभा मतदारसंघातील कार्यकर्ते उपस्थित होते. (प्रतिनिधी) लवकरच मोठी जबाबदारी संघटनात्मक वाढीसाठी तरुण कार्यकर्त्यांचे शिवसेनेत स्वागत करतो. संग्रामसारख्या आक्रमक कार्यकर्त्यामुळे कोल्हापूर जिल्ह्यात शिवसेना अधिक भक्कम होईल. लवकरच त्यांच्यावर पक्षातील महत्त्वाची जबाबदारी सोपविली जाईल, जेणेकरून संघटनावाढीसाठी त्याचा उपयोग होईल, असे पक्षप्रमुख उद्धव ठाकरे यांनी यावेळी सांगितले. संघटनात्मक काम करण्यासाठी शिवसेना चांगला पक्ष असल्याने जनतेच्या इच्छेखातर हा निर्णय घेतला आहे. चंदगड विधानसभा मतदारसंघात शिवसेना भक्कम करण्यासाठी आगामी काळात प्रयत्न करणार असून, कोणत्याही परिस्थिती आगामी विधानसभा निवडणुकीत शिवसेनेचा आमदार करण्यासाठी जिवाचे रान करणार आहे. - संग्राम कुपेकर