: मंत्री, खासदार, आमदारांनी केला सर्व्हे, चौपदरी रस्त्यातील त्रुटी दूर होणार
कागल : सातारा ते कागल राष्ट्रीय महामार्ग सहापदरी झाल्यानंतर रस्ते सुरक्षा वाढेल, असा विश्वास ग्रामविकास मंत्री हसन मुश्रीफ यांनी व्यक्त केला. मंत्री मुश्रीफ यांच्यासह पालकमंत्री सतेज पाटील, खासदार संजय मंडलिक, आमदार चंद्रकांत जाधव, आमदार ऋतुराज पाटील यांनी रस्ते विकास मंडळाच्या अधिकाऱ्यांना घेऊन कागल ते घुणकी दरम्यान सहापदरीकरणाच्या कामाचा सर्व्हे केला.
चौपदरीकरण कामात अनेक त्रुटी राहिल्या आहेत. याबद्दल कागलमधील नागरिकांनी कृती समिती स्थापन करत तीव्र आंदोलनही केले होते. ही कामे अनेक वर्षे प्रलंबित आहेत. अशीच अवस्था अन्य ठिकाणीही असल्याने आज ही प्रत्यक्ष पाहणी करण्यात आली. अधिकारी वर्गाला सूचना केल्या. बोगदे, उड्डाणपूल, दुभाजक, सर्कल, सर्व्हिस रस्ते गटर्स याबद्दल ही चर्चा झाली. तसा सुधारित आराखडा तयार करण्याच्या सूचना दिल्या. या वेळी जिल्हा परिषद सदस्य युवराज पाटील, महामार्ग कृती समिती कागलचे अध्यक्ष भय्या माने, उपाध्यक्ष संजय ठाणेकर, नगरसेवक प्रवीण काळबर, आनंदराव पसारे, जिल्हा परिषद सदस्य शशिकांत खोत , संग्राम लाड, संग्राम गुरव यांच्यासह राष्ट्रीय महामार्गाचे प्रकल्प संचालक वसंत पंढरकर, सर्वेअर व्ही. एन. पाटील काटकर आदी प्रमुख उपस्थित होते.
चौकट 1)
● कागलजवळ भराव नको...
कागल बसस्थानकाजवळील भुयारी मार्गाचे चौपदरीकरण होईल. येथे भराव न टाकता उड्डाण पुलासारखी खाली जागा रिकामी ठेवावी, अशी सूचना मंत्री मुश्रीफ यांनी केली. आर.टी.ओ चेक पोस्ट भुयारी मार्ग मोठा करणे, मुरगुड नाका उड्डाण पूल, जोड पूल नवा बांधणे. एसटी आगारासमोर भुयारी मार्ग अशा विविध कामांचा समावेश या वेळी करण्यात आला.
चौकट 2
● लक्ष्मी टेकडीवर उड्डाण पूल.
सर्वेक्षणावेळी पंचतारांकित औद्योगिक वसाहतीतील उद्योजक व कर्मचाऱ्यांचे शिष्टमंडळ लक्ष्मी टेकडीजवळ भेटले. सध्या या चौकातील वाहतुकीची धोकादायक स्थिती त्यांनी प्रत्यक्षात दाखवून दिली. लक्ष्मी मंदिरासमोर उड्डाणपुलासह सेवा रस्त्यांचीही आवश्यकता पटवून दिली. उंच टेकडीवर हा चौक असल्याने तो उकरून त्याची पातळी खाली आणुन त्यावर उड्डाण पुलाचा पर्याय सुचविण्यात आला.
--
महामार्ग सहापदरीकरण कामासाठी अधिकारी वर्गाला घेऊन कागल ते घुणकी दरम्यान आज लोकप्रतिनिधींनी विविध ठिकाणी सर्वेक्षण केले. मंत्री हसन मुश्रीफ, पालकमंत्री सतेज पाटील, खासदार संजय मंडलिक आमदार चंद्रकांत जाधव आमदार ऋतुराज पाटील, भय्या माने आदींनी ही पाहणी केली.