Kolhapur: मेंढपाळ तरुणाचा गळा चिरून खून, शिरोळ तालुक्यात उडाली खळबळ 

मृत तरुण काल, सोमवार (दि.१७) दुपारपासून बेपत्ता होता

गणपती कोळीकुरुंदवाड: मजरेवाडी (ता. शिरोळ) येथे मेंढपाळ तरुणाचा अज्ञाताने धारधार शस्त्राने गळा चिरुन खून केला. सावकार कल्लाप्पा देबाजे (वय ३५) असे या मृत तरुणाचे नाव आहे. मजरेवाडी - कुरुंदवाड रस्त्यावर बीपीएड कॉलेज इमारतीजवळील कुरणी शेतातील झुडुपात हा मृतदेह आढळून आला. ही घटना आज, मंगळवारी दुपारी उघडकीस आली. खुनी व खुनाचे कारण अद्याप स्पष्ट झाले नसले तरी मृत तरुणाजवळील मोबाईल व दुचाकी वाहन पोलिसांनी जप्त केली आहे. घटनास्थळी  बघ्यांची मोठी गर्दी झाली होती. दरम्यान घटनास्थळी पोलिस उपअधीक्षक रामेश्वर वैजयनी यांनी भेट देऊन पाहणी केली. तसेच मार्गावरील सीसीटीव्ही फुटेजची पाहणी करण्यात येत असून एका संशयिताला पोलिसांनी चौकशीसाठी ताब्यात घेतले आहे.घटनास्थळावरून मिळालेल्या माहितीनुसार, मृत देबाजे हा मेंढपाळ आहे. काल, सोमवार (दि.१७) दुपारपासून तो बेपत्ता होता. नातेवाईक त्याचा शोध घेत होते. दरम्यान आज मंगळवारी दुपारी कुरुंदवाड रस्त्यावरील बीपीएड महाविद्यालय इमारतीजवळ रस्त्यावर देबाजे याची दुचाकी गाडी (एम एच ०९ बीडी ५२५१) दिसली. यावेळी परिसरात शोध घेतला असता काटेरी झुडपात गळा चिरलेल्या स्थितीत देबाजे याचा मृतदेह आढळून आला.खुनाची घटना समजताच कुरुंदवाड पोलिस ठाण्याचे सहाय्यक पोलिस निरीक्षक बालाजी भांगे, पोलिस उपनिरीक्षक अमित पाटील पोलिस फौजफाटा घेऊन घटनास्थळी दाखल होवून पंचनामा केला. मृतदेह उत्तरीय तपासणीसाठी दत्तवाड ग्रामीण रुग्णालयात पाठवण्यात आले आहे. याप्रकरणी पोलिस अधिक तपास करीत आहेत.