बांबरवाडी येथे मुलीचा गळफास लागून मृत्यू

पन्हाळा : बांबरवाडी (ता. पन्हाळा) येथे चौथीमध्ये शिकणाऱ्या आर्या (वय ११) हिचा खेळता-खेळता गळफास लागल्याने मृत्यू झाला. आईवडील बाहेर गेले असताना हा अपघात घडला. चिमुकल्या मुलीचा हकनाक बळी गेल्याने परिसरात हळहळ व्यक्त होत आहे. याबाबत मिळालेल्या माहितीनुसार आर्या संतोष मोरादकरचे आई, वडील हॉटेल चालवतात, तसेच ते केकपण बनवून देतात. गुरुवारी दिवसभर काही खरेदीसाठी हे दोघे कोल्हापूर येथे गेले होते. त्यामुळे आर्या व तिची लहान बहीण घरीच होते. दुपारी आर्या आपल्या लहान बहिणीला घेऊन जवळच असलेल्या मामाच्या घरी गेली. पण, थोड्याच वेळात ती एकटीच घरी गेली. तिची आई घरी आली असता दार उघडेना म्हणून पर्यायी मार्गाने घरी प्रवेश केल्यानंतर आर्याला ओढणीचा फास लागल्याचे लक्षात आले. तिला उपचारासाठी दवाखान्यात नेले असता मृत म्हणून घोषित करण्यात आले.