सालपेवाडी (ता. भुदरगड) येथील दत्तात्रय विठ्ठल गोरे या शेतकऱ्यावर गव्याने हल्ला करून जबर जखमी केले. ही घटना आज शुक्रवारी ( दि १२) रोजी सकाळी घडली. गोरे यांना उपचारासाठी गारगोटी येथील ग्रामीण रुग्णालयात दाखल करण्यात आले आहे.
आज पहाटे एक गवा सालपेवाडीजवळच्या उसाच्या शेतात बसून होता. याठिकाणी बिद्री कारखान्याची ऊसतोड सुरू होती. ऊसतोड करणाऱ्या स्थानिक शेतकऱ्यांना गवा दिसल्यानंतर त्याला घालवण्यासाठी आरडाओरडा केला. दरम्यान, गवा उठून शेतकऱ्यांच्या दिशेने धावू लागला. गव्याने गोरे यांना पाठीमागून जोराने धडक मारली असता, गोरे तोंडावर पडले व रक्तबंबाळ झाले.
यानंतर जखमी गोरे यांना गारगोटी ग्रामीण रुग्णालयात उपचारासाठी आणण्यात आले. तेथे त्यांच्यावर डॉ. मिलिंद कदम यांनी प्राथमिक उपचार केले. दरम्यान, वनपरिक्षेत्र अधिकारी किशोर आहेर यांनी घटनास्थळी भेट देऊन पंचनामा करण्याचे आदेश दिले आहेत.
फोटो ओळ
जखमी १२दत्तात्रय गोरे