गांधीनगर : वळीवडे (ता. करवीर) येथील मुस्लीम समाजाच्या दोन गटात हदीस पठणावरून झालेल्या हाणामारीत दोन्ही गटाचे मिळून सहा जण जखमी झाले. तर २१ जणांवर गुरुवारी गांधीनगर पोलीस ठाण्यात गुन्हा दाखल करण्यात आला आहे. फिरोज गुलाब पठाण व जमीर मेहबूब नदाफ यांनी परस्परविरोधी फिर्यादी नोंदवल्या आहेत. वळीवडे येथील जामा मशिदीमध्ये गुलाब पठाण आणि त्यांचे सहकारी नमाज पठण करीत होते. त्यावेळी तबलिक निजामुद्दीन आणि तबलिक शुरा गटातील लोकांमध्ये हदीस पठण करण्याच्या कारणावरून वाद सुरू झाला. जमिर नदाफ व त्यांचे सहकारी येथे येऊन हदीस पठण करू नका, असे सांगून शिवीगाळ करू लागले. त्यामध्ये दोन्ही गटात हाणामारीत झाली.
जखमी फिरोज गुलाब पठाण (रा. मनेरमळा उचगाव ) यांनी दिलेल्या फिर्यादीनुसार जमीर मेहबूब नदाफ, इरफान इक्बाल नदाफ, अमीर मेहबूब नदाफ, शुक्रणा जमीर नदाफ, आयेशा इरफान नदाफ ,खदीजा अमीर नदाफ, रुबाबी मेहबूब नदाफ,( सर्व रा. वळीवडे) यांच्यावर गुन्हा दाखल करण्यात आला आहे, तर जमीर मेहबूब नदाफ (रा.वळीवडे) यांनी दिलेल्या फिर्यादीनुसार चांद नदाफ, मेहबूब नदाफ, सलीम नदाफ, शकील नदाफ, दस्तगीर नदाफ, युनुस नदाफ, अश्पाक नदाफ, व मनेरमळा येथील अमीर साहब व त्यांचे पाच ते सहा सहकारी अशा १४ जणांवर गुन्हा दाखल करण्यात आला आहे. यामध्ये फिर्यादी जमीर नदाफ, समीर नदाफ, शुक्राना नदाफ, रूबाबी नदाफ, मोहम्मद नदाफ (सर्व रा. वळीवडे) हे पाच जण जखमी झाले आहेत. दोन्ही गटाकडून परस्परविरोधी फिर्याद गांधीनगर पोलीस ठाण्यात दाखल झाले असून अधिक तपास सपोनि सत्यराज घुले करीत आहेत.