अपघातात मृत्यूस कारणीभूत प्रकरणी दुचाकीस्वारावर गुन्हा

कोल्हापूर : भरधाव दोन दुचाकींची समोरासमोर धडक होऊन झालेल्या अपघातात मंगेश पांडुरंग नाडकर्णी (वय ५२, रा. महालक्ष्मी हौसिंग सोसा., ताराबाई पार्क) यांचा मृत्यू झाला होता. नाडकर्णी यांच्या मृत्यूस कारणीभूत ठरल्याप्रकरणी दुचाकीस्वार रामसिंग मारुती पाटील (रा. सावर्डे तर्फ सातवे, ता. पन्हाळा) यांच्यावर जुना राजवाडा पोलीस ठाण्यात गुन्हा दाखल केला आहे.

पोलिसांनी दिलेली माहिती अशी की, फुलेवाडी मुख्य मार्गावर पहिला स्टॉप, मनोहर सृष्टी अपार्टमेंटनजीक दोन दुचाकींची समोरासमोर धडक झाली. या अपघातानंतर रामसिंग पाटील हा दुचाकीस्वार वर्दी न देताच पसार झाला. या अपघातात दुसरे दुचाकीस्वार मंगेश नाडकर्णी हे गंभीर जखमी झाले. ही घटना दिनांक २१ मार्च रोजी घडली. दरम्यान, जखमीवर रुग्णालयात उपचार सुरु असताना त्यांचा मृत्यू झाला. या मृत्यूला कारणीभूत ठरल्याप्रकरणी पाटील यांच्यावर शनिवारी रात्री उशिरा जुना राजवाडा पोलीस स्थानकात गुन्हा दाखल करण्यात आला आहे.